25 جولائی ، 2023 
کراچی میں بارش کا سلسلہ جاری، رات گئے تک وقفے وقفے سے بارش جاری رہے گی
25 جولائی ، 2023
محکمہ موسمیات کا کہنا ہےکہ کراچی میں آج رات تک وقفے وقفے سے بارش کا امکان ہے۔
چیف میٹرولوجسٹ سردارسرفراز کے مطابق ہوا کا کم دباؤ کراچی کے جنوب مغرب میں سمندر پرموجود ہے جس کے باعث بیشتر علاقوں میں ہلکی سے معتدل اور چند مقامات پر تیز بارش کا امکان ہے۔
سردار سرفراز نے بتایا کہ سندھ کے دیگر مقامات پر 26 جولائی کی رات تک بارش کا امکان ہے جب کہ اگست کے پہلے ہفتے تک مزید کوئی مون سون سسٹم کے سندھ پر اثرانداز ہونے کا امکان نہیں ہے۔
شہر میں ہلکی سے درمیان بارش کا امکان
دوسری جانب موسمیاتی تجزیہ کار جواد میمن کا کہنا ہےکہ کراچی کے شمالی علاقوں سےکچھ دور گرج چمک کے بادل بن رہے ہیں، شہر کے وسطی اور مغربی حصوں پر بھی مزید بادل بھی بن رہے ہیں۔
انہوں نے کہا کہ شہر میں ہلکی سے درمیانی بارش کا امکان ہے، چند علاقوں میں وقفے وقفے سے تیز بارش کا بھی امکان ہے جب کہ حیدرآباد، شہداد پور اور میرپورخاص کے علاقوں کے قریب بھی بارش برسانے والے بادل بن رہے ہیں۔
مختلف علاقوں میں ہلکی تیز بارش
علاوہ ازیں کراچی کے مختلف علاقوں میں وقفے وقفے سے ہلکی اور تیز بارش کا سلسلہ جاری ہے جہاں نارتھ ناظم آباد، ناظم آباد، نیو کراچی، نارتھ کراچی، شارع فیصل، ملیر، ناتھا خان، گلشن اقبال، گلستان جوہر، اورنگی ٹاؤن، کورنگی، سہراب گوٹھ، صدر، آئی آئی چندریگر روڈ اور دیگر علاقوں میں وقفے وقفے سے ہلکی تیز بارش کا سلسلہ جاری ہے۔
