02 اگست ، 2023 
’پاکستان میں طیاروں کو کوئی خطرہ نہیں‘، سی اے اے کا ایاسا کی ہدایات پر سخت ردعمل
02 اگست ، 2023
کراچی: پاکستان سول ایوی ایشن اتھارٹی نے یورپی ایوی ایشن ایجنسی ایاسا کی ہدایات پر سخت ردعمل جاری کر دیا۔
سول ایوی ایشن اتھارٹی کا کہنا ہے کہ پاکستان کی فضائی حدود دنیا کی تمام ائیر لائنز کے طیاروں کے لیے مکمل محفوظ ہے، ایاسا کی جاری ہدایات میں طیاروں کو اینٹی ائیر کرافٹ گنز اور میزائل کے خطرے کی بات مکمل طور پر بے بنیاد ہے۔
سی اے اے نے کہا کہ پاکستانی فضائی حدود کے متعلق 28 جولائی کو جاری یورپی ایوی ایشن ایجنسی کی ہدایات کو مکمل رد کیا جاتا ہے، پاکستان میں کوئی تنازع نہیں ہے، اس لیے طیاروں کو کسی قسم کا کوئی خطرہ نہیں۔
سی اے اے نے مزید کہا کہ برطانیہ نے بھی پاکستان کی فضائی حدود کو طیاروں کے لیے مکمل محفوظ قرار دیا ہے، برطانیہ کی برٹش ائیرویز پاکستان میں اپنا فلائٹ آپریشن جاری رکھے ہوئے ہے، پاکستان میں تمام ائیر لائنز کے آپریشنز جاری ہیں، ایاسا کی پاکستانی فضائی حدود میں 26 ہزار فٹ سے نیچے طیاروں کو خطرے کی بات بھی من گھڑت اور بے بنیاد ہے۔
سی اے اے کا کہنا تھا کہ جرمنی اور فرانس سمیت یورپی ملکوں نے بھی پاکستانی فضائی حدود کو طیاروں کے لیے مکمل محفوظ قرار دیا ہے، پاکستان میں کسی بھی عنصر کو طیارہ شکن ہتھیاروں، خاص طور پر مین پورٹیبل ائیر ڈیفنس سسٹم طیارہ شکن میزائل سسٹم تک رسائی حاصل نہیں ہے۔
