05 ستمبر ، 2023 
پرویز الٰہی کو رہائی کے بعد دوبارہ گرفتار کر لیا گیا
05 ستمبر ، 2023
پاکستان تحریک انصاف کے صدر پرویز الٰہی کو رہائی کے بعد دوبارہ گرفتار کرلیا گیا۔
پرویز الٰہی کو رہا کرکے وکیل کی گاڑی میں روانہ کیا گیا تاہم پولیس لائنز سے کچھ دور پہنچتے ہی دوبارہ گرفتار کیا گیا۔
ذرائع کے مطابق پرویز الٰہی کواسلام آباد پولیس کے انسداد دہشت گردی ڈویژن نے گرفتار کیا۔
دوسری جانب اسلام آباد پولیس کا کہنا ہے کہ پرویز الٰہی کو تھانہ سی ٹی ڈی نے مقدمہ نمبر 3/23 میں گرفتار کیا ہے۔
اُدھر پمز اسپتال سے ڈاکٹرز کی ٹیم پرویزالٰہی کے چیک اپ کیلئے پولیس لائنزپہنچ گئی۔ ذرائع نے بتایاکہ ڈاکٹرز کی ٹیم ان کا چیک اپ کرے گی۔
خیال رہے کہ اسلام آباد ہائیکورٹ نے پرویز الٰہی کی تھری ایم پی او کے تحت نظربندی معطل کرتے ہوئے انہیں رہا کرنے کا حکم دیا تھا۔
عدالت نے پرویز الٰہی کو آئندہ سماعت پر پیش ہونے اور کسی قسم کا کوئی بیان نہ دینے کی بھی ہدایت کی تھی۔
