رحیم یار خان سے گیس کے نئے ذخائر دریافت، یومیہ 11 لاکھ مکعب فٹ گیس حاصل ہوگی

آئل اینڈ گیس ڈویلپمنٹ کمپنی (او جی ڈی سی ایل) نے رحیم یار خان سے گیس کے نئے ذخائر دریافت کر لیے۔

اعلامیے کے مطابق رحیم یار خان میں چک 214-1 ایکسپلوریٹری کنویں سے گیس کے بڑے ذخائر دریافت ہوئے۔

اعلامیے میں کہا گیا ہے کہ کمپنی نے 29جون 2023 کو کنویں میں 1851میٹر تک کھدائی کی، ابتدائی طور پر یومیہ 11 لاکھ مکعب فٹ گیس کی پیداوار حاصل ہوگی۔

اعلامیے کے مطابق اس دریافت سے توانائی کی طلب اور رسد میں فرق کم کرنے میں مدد ملے گی۔

اعلامیے میں بتایا گیا ہے کہ او جی ڈی سی ایل 100فیصد حصص کے ساتھ ماڑی ایسٹ بلاک کا واحد آپریٹر ہے۔