27 اکتوبر ، 2023 
پی ٹی آئی وفد اور فضل الرحمان کے درمیان کیا بات ہوئی؟ اندرونی کہانی سامنے آگئی
27 اکتوبر ، 2023
پاکستان تحریک انصاف کے وفد کی جمعیت علمائے اسلام (جے یو آئی) کے سربراہ مولانا فضل الرحمان سے ملاقات کی اندرونی کہانی سامنے آگئی۔
ذرائع کے مطابق بیرسٹر سیف کی جانب سے ملاقات کیلئے مولانا فضل الرحمان سے رابطہ کیا گیا، ملاقات کیلئے پی ٹی آئی سینیئر لیڈرشپ کا مکمل اعتماد حاصل تھا۔
پارٹی ذرائع نے بتایاکہ ایک گھنٹہ 15 منٹ کی ملاقات میں تعزیت کے ساتھ ساتھ ملکی اور سیاسی حالات پرگفتگو ہوئی۔
پارٹی ذرائع کا کہنا ہے کہ ملاقات کا مقصد سیاسی نفرتوں میں بات چیت کیلئے سازگار ماحول پیدا کرنا تھا، مولانا فضل الرحمان پی ٹی آئی رہنماؤں کو گاڑی تک بٹھانے خود باہر آئے۔
ذرائع کے مطابق موجودہ سیاسی صورتحال پر مختصر اورخیریت دریافت کرنے پر زیادہ توجہ رہی، ملاقات میں پاکستان افغانستان تجارت پر بھی مختصر گفتگو ہوئی۔
خیال رہے کہ گزشتہ روز پی ٹی آئی وفد نے مولانا فضل الرحمان سے اسلام آباد میں ان کی رہائش گاہ پر ملاقات کی تھی۔ دونوں جماعتیں ملکی سیاست میں سخت حریف سمجھی جاتی ہیں۔
