17 جنوری ، 2013 
کراچی: منظر امام کی ہلاکت، مختلف علاقوں میں حالات کشیدہ، کاروباربند
17 جنوری ، 2013
کراچی … ایم کیو ایم کے رہنما اور رکن سندھ اسمبلی منظر امام کی نامعلوم افراد کے ہاتھوں شہادت کے بعد کراچی کے مختلف علاقوں میں کشیدگی پھیل گئی، دکانیں اور کاروباری مراکز بند ہونا شروع ہوگئے ، حیدر آباد میں فائرنگ سے خاتون جاں بحق ہوگئی۔ اورنگی ٹاوٴن میں نامعلوم افراد کی فائرنگ سے ایم کیو ایم کے رہنما منظر امام کی 3 ساتھیوں سمیت شہادت کے بعد شہر کے مختلف علاقوں میں حالات کشیدہ ہونا شروع ہوگئے۔ گلشن اقبال ، گلستان جوہر ، واٹر پمپ چورنگی اور دیگر علاقوں میں نامعلوم افراد کی جانب سے ہوائی فائرنگ کی گئی جس کے باعث دکانیں اور کاروباری مراکز بند ہونا شروع ہوگئے جبکہ بعض مقامات پر ٹریفک جام ہونے کی بھی اطلاعات ہیں۔ صدر آل کراچی تاجر اتحاد نے کراچی میں امن و امان کی خراب صورتحال پر آج بازار بند کرنے کا اعلان کردیا ہے۔ دوسری جانب حیدر آباد میں بھی نامعلوم افراد کی جانب سے مختلف علاقوں میں فائرنگ کی گئی ، پولیس کے مطابق فائرنگ سے ایک خاتون جاں بحق ہوگئی۔
