شاہد آفریدی نے شاہین کو آسٹریلیا کیخلاف پاکستان کا اہم ہتھیار قرار دیدیا

قومی ٹیم کے سابق کپتان شاہد آفریدی نے فاسٹ بولر شاہین شاہ آفریدی کو آسٹریلیا کے خلاف تین ٹیسٹ میچوں کی سیریز میں پاکستان کا اہم ہتھیار قرار دیدیا۔

پاکستان اور آسٹریلیا کے خلاف بینو قادر ٹرافی کا پہلا میچ 14 دسمبر سے پرتھ میں شروع ہو گا اور شاہد آفریدی کو سیریز میں دونوں ٹیموں کے درمیان دلچسپ مقابلے کی توقع ہے۔

شاہد آفریدی نے اپنے داماد شاہین شاہ آفریدی کو آسٹریلیا کے خلاف پاکستان کا اہم ہتھیار قرار دیتے ہوئے کہا آسٹریلیا کی کنڈیشنز میں شاہین کو بولنگ کرنے کا مزہ آئے گا۔

ان کا کہنا تھا شاہین شاہ آفریدی کسی بھی بیٹر کے لیے مشکلات پیدا کرنے کی بھرپور صلاحیت رکھتا ہے۔

انہوں نے یہ بھی کہا کہ آسٹریلیا اپنی کنڈیشنز میں بہت خطرناک ٹیم ہے اور آسٹریلیا کی موجودہ ٹیم کا بیٹنگ آرڈر بہت تگڑا ہے۔

اپنے حوالے سے گفتگو کرتے ہوئے شاہد آفریدی کا کہنا تھا خوش قسمت ہوں کہ آسٹریلیا کے بہترین کھلاڑیوں کے خلاف کرکٹ کھیلی، شین وارن سے بولنگ ٹپس لیتا تھا، وہ ایک شاندار کرکٹر اور فائٹر تھے۔