وہ اسمارٹ فون جو 16 ہزار فٹ کی بلندی سے گرنے کے باوجود بالکل ٹھیک رہا

6 جنوری کو امریکا کی الاسکا ائیر لائنز کی ایک پرواز کا کچھ حصہ فضا میں اڑ گیا تھا جس کے بعد اسے ہنگامی طور پر لینڈ کیا گیا۔

الاسکا ائیر لائنز کی پرواز اے ایس اے 1282 کا وہ حصہ 16 ہزار فٹ کی بلندی پر فضا میں اڑ گیا تھا۔

یہ طیارہ اوریگن سے کیلیفورنیا جا رہا تھا جب اس کی کھڑکی چکنا چور ہوئی اور اسمارٹ فونز سمیت مختلف اشیا فضا میں اڑ گئیں۔

اس میں ایک آئی فون بھی تھا (جس کا ماڈل واضح نہیں) جو 16 ہزار فٹ کی بلندی سے زمین پر جاگرا۔

امریکی ائیرلائن ریگولیٹر کا بوئنگ کے 737 میکس 9 طیاروں کو گراؤنڈ کرنیکا حکم

امریکی ائیرلائن ریگولیٹر نے طیاروں کا جائزہ لینے کا فیصلہ کیا ہے جس دوران دنیا بھر میں 171 طیارے متاثر ہوں گے

نیشنل ٹرانسپورٹیشن سیفٹی بورڈ نے تصدیق کی ہے کہ 16 ہزار فٹ کی بلندی سے گرنے کے باوجود یہ اسمارٹ فون درست طریقے سے کام کر رہا تھا۔

اس اسمارٹ فون کو ایک کیس میں رکھا گیا تھا تاکہ اسے تحفظ مل سکے۔

Seanathan Bates نامی شخص نے ایکس (ٹوئٹر کا نیا نام) پر ایک پوسٹ میں اس فون کی تصاویر شیئر کیں۔

انہوں نے ایکس پوسٹ میں کہا کہ انہیں ایک سڑک کے کنارے پر ائیر پلین موڈ پر کام کرنے والا ایک آئی فون ملا ہے جو 16 ہزار فٹ کی بلندی سے گرنے کے باوجود بالکل ٹھیک ہے۔

انہوں نے نیشنل ٹرانسپورٹیشن سیفٹی بورڈ سے رابطہ کرکے اس بارے میں بتایا تو بورڈ کا کہنا تھا کہ یہ طیارے سے گرنے والا دوسرا فون ہے جو ملا ہے۔

وہ آئی فون حیران کن طور پر اتنی بلندی سے گر کر بھی بچ گیا۔

وہ فون نہ صرف فعال تھا بلکہ اس کی 50 فیصد بیٹری بھی باقی تھی جبکہ ایس او ایس موڈ بھی کام کر رہا تھا۔

خیال رہے کہ اس حادثے کے بعد الاسکا ائیر لائنز نے عارضی طور پر تمام بوئنگ 737 میکس 9 طیاروں کا آپریشن معطل کر دیا تھا۔

خوش قسمتی سے اس حادثے میں کسی کو نقصان نہیں پہنچا تھا۔