19 جنوری ، 2024
لاہور ہائیکورٹ نے اسموگ کے تدارک کے لیے بروقت کیفے بند نہ کرنے والوں پر جرمانے کرنے کا حکم دے دیا۔
اسموگ کے تدارک کے لیے دائر درخواستوں پر سماعت لاہور ہائیکورٹ میں ہوئی۔
ممبر جوڈیشل کمیشن نے عدالت کو بتایا کہ 95 فیصد کیفے جوہر ٹاؤن میں موجود ہیں، اسسٹنٹ کمشنر ماڈل ٹاؤن کو کیفے دیر سے بند کرنے پر بتاتے ہیں، اے سی ماڈل ٹاؤن کہتے ہیں الیکشن ڈیوٹی میں مصروف ہوں۔
عدالت نے بروقت کیفے بند نہ کرنے والوں پر جرمانے کرنے کا حکم دیتے ہوئے کہا کہ پہلی خلاف ورزی پر 2 لاکھ اور دوسری بار خلاف ورزی کرنے پر 5 لاکھ روپے جرمانہ کیا جائے۔
لاہور ہائیکورٹ نے اپنے فیصلے میں کہا کہ تیسری بار خلاف ورزی کرنے پر کیفے کو سیل کر دیا جائے۔
یاد رہے کہ لاہور ہائیکورٹ نے اسموگ کے تدارک کے لیے کیفیز کو رات 10 بجے بند کرنے کی ہدایت جاری کر رکھی ہے۔