11 فروری ، 2024 
جاتی امرا میں مسلم لیگ ن اور ایم کیو ایم کی ملاقات کا احوال سامنے آگیا
11 فروری ، 2024
وفاق میں حکومت سازی کے لیے رابطوں اور ملاقاتوں کا سلسلہ جاری ہے اور اسی حوالے سے لاہور میں مسلم لیگ ن اور ایم کیو ایم کے قائدین کی ملاقات ہوئی۔
ن لیگ کی طرف سے نواز شریف اور ایم کیو ایم کی طرف سے خالد مقبول صدیقی نے وفد کی قیادت کی، اس ملاقات میں شہباز شریف، مریم نواز، اسحاق ڈار، احسن اقبال، رانا ثنا اللہ بھی شریک تھے۔
ترجمان ن لیگ مریم اورنگزیب کے مطابق نواز شریف اور ایم کیو ایم قیادت کے درمیان مل کر چلنے پر اصولی اتفاق ہوا ہے، ملک و قوم کے مفاد کے لیے مل کر چلا جائے گا اور اس حوالے سے ن لیگ اور ایم کیو ایم میں بنیادی نکات طے پاگئے ہیں۔
مریم اورنگزیب کا مزید بتانا تھا کہ اس ملاقات میں صورتحال پر تفصیلی مشاورت ہوئی اور تجاویز کا تبادلہ ہوا، دونوں سیاسی جماعتوں کے رہنماؤں نے مجموعی سیاسی صورتحال اور اب تک رابطوں پر بھی ایک دوسرے کو اعتماد میں لیا۔
