کراچی…12ربیع الاول جشن عیدمیلا د النبی ﷺ کے موقع پر کراچی سمیت ملک بھر میں نکلنے والے جلوسوں کی گزرگاہوں پر ایم کیوایم کے زیر اہتمام سینکڑوں استقبالیہ کیمپس لگائے گئے ،شربت اور پانی کی سبیلیں قائم کی گئیں ، جلوسوں کے شرکاء پر گل پاشی کی گئی اور مٹھائی اورلنگر تقسیم کیا گیا جبکہ کراچی سمیت ملک بھر میں نکلنے والے مرکزی جلوسوں میں ایم کیوایم کی رابطہ کمیٹی ، حق پرست سینیٹر ز، ارکان قومی وصوبائی اسمبلی ، ایم کیوایم علماء کمیٹی کے اراکین ، زونل انچارجز و اراکین ،سیکٹر ز انچارج و اراکین کمیٹی ، یونٹس انچارج و اراکین کمیٹی ، ڈسٹرکٹ انچارجز و اراکین نے شرکت کی اور استقبالیہ کیمپوں سے جلوسوں کے شرکاء پر گل پاشی کرکے ان کااستقبال کیا، کراچی میں ایم کیوایم کے زیر اہتمام جشن عید میلا د النبی کے موقع پر 25استقبالیہ کیمپس لگائے گئے جن میں شربت اور پانی کی سبیلیں بھی شامل ہیں ، ان استقبالیہ کیمپوں میں سے پانچ کیمپ جن میں اللہ والا مارکیٹ ایم اے جناح روڈ ، مین نمائش چورنگی ایم اے جناح روڈ ، دل پسند سوئٹس ، مین روڈ گلبہار سینیٹر ی مارکیٹ چاندنی چوک اور جامع لیاقت آباد میں جامع مسجد قادریہ بی ایریا میں لگائے گئے کیمپس مرکزی طور پر قائم کئے گئے تھے،جلوسوں کے شرکاء پر گل پاشی کی گئی ، لنگر اور مٹھائیاں تقسیم کی گئیں ۔ کراچی کی طرح اندرون سندھ میں جشن عید میلاد النبی ﷺ کے جلوسوں کی گزرگاہوں پر سینکڑوں استقبالیہ کیمپس لگائے گئے ، لنگر اور مٹھائیاں تقسیم کی گئیں۔اس سلسلے میں ایم کیوایم حیدرآباد زون ، میر پور خاص زون ، سکھر زون کی جانب سے کیمپس لگائے گئے ، ذمہ داران و کارکنان نے جلوسوں کے شرکاء کا خیر مقدم کیا اور ان پر پھولوں کی پتیاں نچھاور کیں اور شرکاء میں مٹھائی اورلنگر تقسیم کیا ۔ جبکہ پنجاب ،خیبر پختونخوا،بلوچستان ، کشمیر ،گلگت وبلستان میں بھی جشن عید میلا د النبی کے جلوسوں کی گزرگاہوں پر استقبالیہ کیمپس لگائے گئے اور جلوسوں کے شرکاء کا استقبال کیا گیا ۔ دریں اثناء رابطہ کمیٹی کے ڈپٹی کنوینر انیس احمد قائم خانی ، اراکین وسیم آفتاب ، رضاہارون ،ڈاکٹر صغیر احمد ، سلیم تاجک، حق پرست وزراء اور منتخب عوامی نمائندوں نے کراچی سے نکلنے والے مرکزی جلوس میں شرکت کی اور اللہ والا مارکیٹ ایم اے جناح روڈ پر لگائے گئے ایم کیو ایم کے مرکزی استقبالیہ کیمپ سے جلوس کے شرکاء کا استقبال کیا اور ان پر پھولوں کی پتیاں نچھاور کیں ۔ اور انہیں قائد تحریک الطاف حسین کی جانب سے جشن عید میلا د النبی کی دلی مبارکبادپیش کی۔