حکومت محسن نقوی کو وزیر داخلہ بناتی ہے تو ہم سے مفاہمت بھول جائیں: اسد قیصر

پاکستان تحریک انصاف کے رہنما اسد قیصر نے کہا ہے کہ اگر حکومت سابق نگران وزیراعلیٰ پنجاب محسن نقوی کو وزیر داخلہ بناتی ہے تو پی ٹی آئی سے مفاہمت بھول جائیں۔

جیو نیوز کے پروگرام نیا پاکستان میں گفتگو کرتے ہوئے اسد قیصر کا کہنا تھاکہ ہم سمجھتے ہیں کہ ملک میں استحکام ہو تاکہ معیشت بہترہو، ابھی الیکٹورل کالج مکمل نہیں ہے، پہلے دوسرے قسم کی چوری ہوتی تھی اب ووٹ چوربھی آگئے ہیں۔

انہوں نے کہا کہ ہمیں مجبورکیا جارہا ہے کہ قانونی آپشن چھوڑکرسڑکوں پرآئیں، اگر مینڈیٹ کوتسلیم نہیں کیا گیا توسڑکوں پرآئیں گے، اگرہماری بات نہیں سنی جاتی توبھرپورطریقے سے سڑکوں پرآئیں گے اوراپنے حق کےلیے لڑیں گے۔

ان کا کہنا تھاکہ عوام کے ووٹ کوتسلیم کیا جائے ووٹ کوعزت دی جائے، ہم سب سے پہلے قانونی جدوجہد کریں گے، ابھی قانونی جنگ لڑرہےہیں اور تھوڑا احتجاج کررہےہیں۔

محسن نقوی سینیٹ کا الیکشن لڑیں گے، مشیر داخلہ بنائے جانے کا امکان

محسن نقوی چیئرمین پی سی بی کا عہدہ بھی برقرار رکھیں گے: ذرائع

اسد قیصر کا کہنا تھاکہ اگر حکومت سابق نگران وزیر اعلیٰ پنجاب محسن نقوی کو وزیر داخلہ بناتی ہے تو پی ٹی آئی سے مفاہمت بھول جائیں، پی ٹی آئی کی کسی سے کوئی بیک ڈور بات چیت نہیں چل رہی، اگر اداروں نے ہماری تسلی نہیں کروائی تو بھرپور احتجاج کریں گے۔

خیال رہے کہ خبر سامنے آئی ہے کہ سابق نگران وزیر اعلیٰ پنجاب اور پاکستان کرکٹ بورڈ کے موجودہ چیئرمین محسن نقوی سینیٹ کا الیکشن لڑیں گے۔ ذرائع کے مطابق محسن نقوی کو مشیرداخلہ بنائے جانے کا امکان ہے۔