10 مارچ ، 2024 
شمالی وزیرستان میں گیس کے ذخائر دریافت، سالانہ 265 ملین ڈالر زرمبادلہ کی بچت ہوگی
10 مارچ ، 2024
شمالی وزیرستان کے علاقے شیوا ون اور شیوا ٹو سے قدرتی گیس کے ذخائر دریافت ہوئے ہیں۔
شمالی وزیرستان کے علاقے شیوا میں ماڑی پیٹرولیم کمپنی کی جانب سے دو کنووں کی کھدائی کے بعد قدرتی گیس دریافت کی گئی ہے جو کہ ملکی گیس کی مجموعی طلب کا کل 5 فیصد ہے۔
یہاں پروسیسنگ پلانٹ بھی موجود ہے جو گیس کو صاف کرکے ایس این جی پی ایل کی پائپ لائن کو منتقل کرتا ہے۔
گیس کے نیشنل گرڈ میں داخل ہونے کے لیے گیس پائپ لائن کا کام 73 فیصد تک مکمل کرلیا گیا ہے۔
چیف آف اسٹاف ماڑی پیٹرولیم اسد رضا کہتے ہیں کہ گیس پروسیسنگ کے لیے پلانٹ بھی مقامی لگایا گیا ہے جس سے غیر ملکی زر مبادلہ کی بچت ہوئی ہے، پلانٹ لگنے سے 900 سے زائد مقامی ہنر مند افراد کو سائٹ پر روزگار بھی میسر آیا ہے۔
شیوا گیس کو قومی نیٹ ورک میں شامل کرنے سے ایل این جی درآمدات پر انحصار کم ہونے کے ساتھ سالانہ تقریباً 265 ملین امریکی ڈالر زرمبادلہ کی بچت ہوگی۔
