نہیں لگتا حکومت ڈیلیور کرسکے گی، جرم کوئی اور کرتا ہے سیاستدان ذمہ داری لے لیتے ہیں: فضل الرحمان

جمعیت علمائے اسلام (جے یو آئی) کے سربراہ مولانا فضل الرحمان نے کہا ہے کہ مجھے  نہیں لگ رہاکہ یہ حکومت ڈیلیورکرسکے گی، عوام سڑکوں پر آئیں گے تو حکومت خودگر جائے گی، جرم کوئی اور کرتا ہے سیاستدان اپنےسرذمہ داری لے لیتے ہیں۔

جیو نیوز کے پروگرام آج شاہ زیب خانزادہ کے ساتھ میں گفتگو کرتےہوئے فضل الرحمان کا کہنا تھاکہ تعین ہونا چاہیے معاملات ہیں کیا، ہمارا مؤقف واضح ہے الیکشن میں دھاندلی ہوئی ہے ، وہ قوت فوکس ہوگی جس نے نتائج تبدیل کیے دھاندلی کی طاقت استعمال کی، یہ ایسے نتائج پر مبنی حکومت ہے جو ہمیں قبول نہیں۔

انہوں نے کہا کہ ان اداروں کے خلاف احتجاج کر رہے ہیں جنہوں نے الیکشن کوکھیل بنا رکھا ہے، عوام سڑکوں پر آئیں گے تو حکومت خودگر جائے گی، جرم کوئی اور کرتا ہے سیاستدان اپنےسرذمہ داری لے لیتے ہیں۔

ان کا کہنا تھاکہ نہیں لگ رہاکہ یہ حکومت ڈیلیورکرسکے گی، پارلیمنٹ ربر اسٹیمپ ہوگی، چیلنجز بہت زیادہ ہیں یہ حکومت چیلنجز کا مقابلہ نہیں کرسکے گی، بالآخر تمام ناکامیوں کی ذمہ داریاں سیاستداں اپنےسر لے لیں گے۔

مولانا فضل الرحمان کا کہنا تھاکہ پی ٹی آئی کے حوالے سے ہمیں اپنے صوبے کے نتائج پراعتراض ہے، ان سے تحفظات الیکشن سے متعلق نہیں نظریاتی تھے، اگر ان کےلیے ماحول بن سکتا ہے تو ہم خیرمقدم کریں گے۔

انہوں نے کہا کہ جماعت نے فی الوقت ایسا فیصلہ نہیں کیاکہ ہم پی ٹی آئی سے مل کرکوئی تحریک چلارہےہیں، پی ٹی آئی کے رویے میں تبدیلی نظر آ ر ہی ہے جو اچھی بات ہے، سیاست میں مثبت رویہ ہے اس طرح ہم آگے بڑھتے ہیں تو مضائقہ نہیں۔

سربراہ جے یو آئی نے کہا کہ نوازشریف سے ملاقات میں بتایا اُنہیں نیا لاڈلہ سمجھتا ہوں۔