ایم کیو ایم اور پی پی ڈیڈ لاک ختم، صدر سے ملاقات کی اندرونی کہانی سامنے آگئی

صدر مملکت آصف علی زرادری سے متحدہ قومی موومنٹ( ایم کیو ایم) رہنماؤں کی ملاقات کی اندرونی کہانی سامنے آگئی۔

صدر آصف زرداری سے متحدہ قومی موومنٹ کے وفد نے کنوینر خالد مقبول صدیقی کی سربراہی میں ملاقات کی۔ایم کیو ایم کے وفد میں ڈاکٹر فاروق ستار، مصطفیٰ کمال اور دیگر شریک تھے۔ 

ذرائع ایم کیوایم کے مطابق متحدہ قومی موومنٹ اور پیپلزپارٹی کے درمیان ڈیڈ لاک تھا جو آج ختم ہوا، مسلم لیگ ن کے رویے کے بعد ایم کیوایم نے حکمت عملی تبدیل کی۔

ذرائع ایم کیو ایم کا کہنا ہے کہ ملاقات میں متحدہ قومی موومنٹ اور پیپلزپارٹی کے درمیان مل کر قوم کی خدمت کرنے پر اتفاق ہوا، وفد نے شہر میں اسٹریٹ کرائم کی وارداتوں پر تشویش کا اظہار کیا۔

صدر مملکت سے ایم کیو ایم وفد کی ملاقات، کراچی میں امن وامان سے متعلق بات چیت

ایم کیوایم وفد نے آصف علی زرداری کو دوبارہ صدر مملکت منتخب ہونے پر مبارکباد دی

ذرائع کے مطابق صدر سے ملاقات میں ایم کیو ایم نے اسٹریٹ کرائم کی روک تھام کے لیے ہر ممکن اقدامات کرنے کی سفارش کی۔

ذرائع کا کہنا ہے کہ ایم کیو ایم اب تمام سیاسی جماعتوں سے عوامی اور سیاسی مسائل پر بات چیت کرےگی۔

ذرائع ایم کیوایم کے مطابق ایم کیو ایم کی قیادت مسلم لیگ ن کے رویے سےنالاں ہے۔