28 جون ، 2024 
پاکستان
گرفتارشخص ڈاکٹرکا حلیہ اپنا کرمریضوں کا چیک اپ کررہاتھا، ملزم پہلے بھی ڈاکٹر کےحلیے میں اسپتال سے پکڑا جاچکا ہے: اسپتال حکام— فوٹو:فائل
’بچپن سے ڈاکٹر بننے کا شوق‘، کراچی سول اسپتال سے ڈاکٹر بن کر گھومنے والا بیکری ملازم پکڑا گیا
28 جون ، 2024
کراچی کے سول اسپتال کے ٹراما سینٹر میں سکیورٹی گارڈز نے جعلی ڈاکٹر بن کر گھومنے والے بیکری کے ملازم کو پکڑ لیا۔
ڈاکٹر گاؤن پہنا عبداللہ نامی شخص سول اسپتال ٹراما سینٹر کے فلور پر گھوم رہا تھا۔شک ہونے پر سکیورٹی گارڈ نے پکڑا تو پتا چلا وہ جعلی ڈاکٹر ہے اور حلیہ دھارے گھوم رہا ہے۔
سکیورٹی گارڈ نے بتایا کہ 3 ماہ قبل بھی اسے پکڑا تھا۔ حکام کہنا ہے کہ گرفتارشخص ڈاکٹرکا حلیہ اپنا کرمریضوں کا چیک اپ کر رہاتھا۔
پولیس حکام کے مطابق اسپتال انتظامیہ نے بتایا عبداللہ کسی بیکری کا ملازم ہے، اسے ڈاکٹر بننے کا شوق ہے اور اسپتال میں گھومتا رہتا ہے۔
اسپتال حکام نے بتایا کہ 3 ماہ پہلے پکڑے جانے پر اسے پولیس کے حوالے کرنے کے بجائے وارننگ دے کر چھوڑ دیا تھا۔
