29 اگست ، 2024 
بلوچستان میں امن و امان کا معاملہ، وزیراعظم ایک روزہ دورے پر کوئٹہ پہنچ گئے
29 اگست ، 2024
کوئٹہ: وزیر اعظم شہباز شریف ایک روزہ دورے پر کوئٹہ پہنچ گئے۔
وزیر اعلیٰ بلوچستان سرفراز بگٹی، اسپیکر بلوچستان اسمبلی عبدالخالق اچکزئی اور دیگرحکام نے وزیراعظم شہباز شریف کا ائیرپورٹ پر استقبال کیا۔
نائب وزیراعظم اسحاق ڈار اور وفاقی وزراء احسن اقبال، محسن نقوی اور جام کمال بھی وزیراعظم کےہمراہ کوئٹہ پہنچے ہیں۔
وزیر اعظم آج کوئٹہ میں امن و امان سے متعلق خصوصی اجلاس کی صدارت کریں گے جس میں آرمی چیف اور وفاقی وزرا سمیت اعلیٰ سول و عسکری حکام بھی شریک ہوں گے۔
اس کے علاوہ وزیراعظم کوئٹہ میں اپیکس کمیٹی کےاجلاس کی صدارت بھی کریں گے۔
واضح رہے کہ 3 روز قبل بلوچستان کے مختلف اضلاع میں دہشت گردی کے پے در پے واقعات میں 50 سے زائد افراد جاں بحق ہوئے تھے جب کہ دہشت گردوں کے خلاف آپریشن کے دوران 21 دہشت گرد مارے گئے اور 14 جوانوں نے جام شہادت نوش کیا تھا۔
