17 ستمبر ، 2024 
گورنر پنجاب کا جامعات کو ڈرگ فری بنانےکیلئے طلبا اور فیکلٹی کے ٹیسٹ کروانےکا اعلان
17 ستمبر ، 2024
لاہور: گورنر پنجاب سردار سلیم حیدر خان نے کہا ہےکہ جامعات کو ڈرگ فری بنانے کے لیے طلبا اور فیکلٹی کے ٹیسٹ کروانے جا رہے ہیں۔
جیو نیوز سےگفتگو کرتے ہوئے گورنر پنجاب سردار سلیم حیدر خان کا کہنا تھا کہ 25 پبلک سیکٹر یونیورسٹیز میں مستقل وائس چانسلرز کام نہیں کر رہے، نگران دور میں عدالتوں نے وائس چانسلرز کی تعیناتیاں روک دی تھیں، وائس چانسلرز کی تعیناتی کے لیے سرچ کمیٹی نے انٹرویوز مکمل کرلیے ہیں، ایک سے دو روز میں تمام یونیورسٹیز کے وائس چانسلرز لگا دیے جائیں گے۔
گورنر پنجاب کا کہنا تھا کہ یونیورسٹیز میں ڈرگز ، ہراسمنٹ اور کرپشن کی بہت شکایات موصول ہوئی ہیں، یونیورسٹیز کو ڈرگ فری بنانے کے لیے طلبا اور فیکلٹی کے ٹیسٹ کروانے جا رہے ہیں، ہراسمنٹ کے خاتمے کے لیے اب یونیورسٹی کے باہرکارڈ چیک ہوں گے۔
گورنرکا مزید کہنا تھا کہ طلبا کے مسائل حل کروانےکے لیے خود یونیورسٹیوں کے دورے کروں گا۔
