20 اکتوبر ، 2024
زمین پر 2 اکتوبر کو سورج گرہن کا نظارہ مختلف مقامات پر دیکھنے میں آیا تھا۔
مگر صرف زمین ہی ایسا سیارہ نہیں جہاں سورج گرہن کا نظارہ دیکھنے میں آتا ہے بلکہ ایسا مریخ پر بھی ہوتا ہے۔
مگر ہمارے پڑوسی سیارے مریخ پر سورج گرہن کا نظارہ کیسا ہوتا ہے؟
امریکی خلائی ادارے ناسا کی جانب سے اس کا جواب دیا گیا ہے۔
ناسا نے گزشتہ دنوں مریخ پر موجود روور پرسیورینس کی جانب سے کھینچی گئی تصاویر جاری کی تھیں۔
ان تصاویر میں مریخ کے چاند فوبوس سے ہونے والے سورج گرہن کو دکھایا گیا ہے۔
مریخ کا یہ چاند اتنا بڑا تو نہیں کہ سورج کو مکمل طور پر ڈھانپ لیں مگر وہاں ہونے والے سورج گرہن کا نظارہ ضرور دلچسپ ہوتا ہے۔
آلو کی ساخت کے چاند فوبوس سے ہونے والا سورج گرہن 30 ستمبر کو ہوا تھا۔
جسے پرسیورینس نے کیمرے کی آنکھ میں محفوظ کیا۔
واضح رہے کہ مریخ کے 2 چاند ہیں جن میں سے فوبوس زیادہ بڑا ہے اور اس کا رقبہ 14 میل ہے۔
مگر ہمارے چاند کے مقابلے میں یہ بہت چھوٹا ہے تو یہ سورج کو بہت کم چھپا پاتا ہے۔
ناسا کے مطابق اس طرح کے سورج گرہن سے مریخ کے اس چاند کے بارے میں تحقیق کرنے میں مدد ملتی ہے۔