23 اکتوبر ، 2024 
ایم این اے مبارک زیب کا آئینی ترمیم پر حکومت کا ساتھ دینے پر مؤقف سامنے آگیا
23 اکتوبر ، 2024
پشاور: باجوڑ سے رکن قومی اسمبلی (ایم این اے) مبارک زیب کا کہنا ہے کہ انہوں نے 26 ویں آئینی ترمیم کے معاملے پر سوچ سمجھ کر وفاقی حکومت کا ساتھ دیا ہے۔
پشاور میں جیو نیوز سے گفتگو میں رکن قومی اسمبلی مبارک زیب کا کہنا تھا کہ پی ٹی آئی نے میرے بھائی شہید ریحان زیب کے ساتھ اچھا سلوک نہیں کیا تھا۔ ترمیم کے لیے ووٹ دینےکے فیصلے سے ریحان زیب کی روح کو سکون مل گیا ہوگا۔
مبارک زیب کا کہنا تھا کہ وفاقی حکومت نے باجوڑ کے لیے فنڈز جاری کرنےکا وعدہ کیا ہے، وفاقی حکومت سے مشیر بنانے کا مطالبہ بھی کیا ہے۔ شہید ریحان زیب کے قاتلوں کی گرفتاری پر وفاقی حکومت سے بات ہوئی ہے۔
مبارک زیب کا کہنا تھا کہ میں پی ٹی آئی کے ٹکٹ پر نہیں آزاد حیثیت سےکامیاب ہوا تھا۔ پی آئی نے تو مجھے پارلیمانی پارٹی واٹس ایپ گروپ میں بھی ایڈ نہیں کیا۔ پی ٹی آئی کا میرے ساتھ سوتیلی ماں جیسا سلوک ہے۔ پی ٹی آئی کا یہی رویہ ہو اور وفاقی حکومت کا تعاون بھی نہ ہو تو علاقےکا کیا بنےگا؟ وزیراعلیٰ کی جانب سے علاقےکے لیے آج تک ایک پائی نہیں ملی۔ علی امین نے ایکسائز پولیس کی ایک خراب گاڑی دی تھی جو واپس لےلی ہے۔
ان کا مزید کہنا تھا کہ میں نہ تو پی ٹی آئی سے وابستہ ہوں اور نہ دوسری سیاسی جماعت میں شرکت کی ہے۔
خیال رہے کہ رکن قومی اسمبلی مبارک زیب باجوڑ سے پی ٹی آئی کے شہید کارکن ریحان زیب کے بھائی ہیں۔
رواں برس فروری میں ہونے والے عام انتخابات کے دوران قومی اسمبلی کے حلقہ این اے باجوڑ 8 سے آزاد امیدوار ریحان زیب نامعلوم افراد کی فائرنگ سے جاں بحق ہو گئے تھے۔
