06 نومبر ، 2024 
الیکشن میں ٹرمپ کی جیت، مسک نے تصویر کے ساتھ پیغام جاری کردیا
06 نومبر ، 2024
دنیا کے امیر ترین شخص اور ایکس کے مالک ایلون مسک ڈونلڈ ٹرمپ کے بہت بڑے حامی ہیں ، ٹرمپ کے دوسری مرتبہ امریکی صدر منتخب ہونے پر ان کی جانب سے ایکس پر پوسٹ کرنے کا سلسلہ جاری ہے۔
ٹرمپ کی جیت کے بعد ایک پوسٹ میں ایلون مسک نے لکھا کہ ' امریکی عوام نے ڈونلڈ ٹرمپ کو تبدیلی کے لیے واضح مینڈیٹ دیا ہے'۔
ایک اور پوسٹ میں ایلون مسک کا کہنا تھا کہ'امریکا معماروں کا ملک ہے اور جلد ہی سب تعمیر کے لیے آزاد ہوں گے'۔
اپنی تازہ ترین پوسٹ میں ایلون مسک نے ٹرمپ کی جیت کی طرف اشارہ کرتے ہوئے اے آئی سے بنی اپنی تصویر پوسٹ کی جس میں وہ امریکی جھنڈے کو سلام کر رہے ہیں۔ پوسٹ میں ایلون مسک نے لکھا کہ 'امریکا میں ایک بار پھر صبح ہوئی ہے'۔
دوسری جانب ٹرمپ بھی ایلون مسک کو نہ بھولے اور صدارتی انتخابات میں کامیابی کے بعد اپنی تقریر میں انہوں نے ایلون مسک کو ری پبلکن پارٹی کا 'نیا اسٹار' قرار دے دیا۔
فلوریڈا میں خطاب کرتے ہوئے ڈونلڈ ٹرمپ نے بتایا کہ کس طرح انہوں نے اسپیس ایکس کی ایک راکٹ ویڈیو دیکھتے ہوئے ایلون مسک کو ایک گھنٹے تک تھامے رکھا۔
انہوں نے ایلون مسک کو حیرت انگیز شخص قرار دیتے ہوئے ری پبلکن پارٹی میں ان کے بڑھتے ہوئے اثر رسوخ پر روشنی بھی ڈالی۔
ایلون مسک نے سوئنگ ریاستوں میں ڈونلد ٹرمپ کے لیے مہم بھی چلائی تھی۔
انہوں نے ڈونلڈ ٹرمپ کی پولیٹیکل ایکشن کمیٹی کو ساڑھے 7 کروڑ ڈالرز کا فنڈ دیا تھا تاکہ ان کی وائٹ ہاؤس میں واپسی ہوسکے۔ وہ ڈونلڈ ٹرمپ کے ساتھ چند سیاسی ریلیوں میں شریک بھی ہوئے۔
ڈونلڈ ٹرمپ نے کہا کہ وہ (ایلون مسک) ایک کردار کے مالک شخص ہیں، وہ ایک خاص شخص ہیں، وہ بہت زیادہ ذہین ہیں، ہمیں اپنے ذہین افراد کو تحفظ دینا ہوگا کیونکہ اب ان کی تعداد زیادہ نہیں رہی'۔
انتخابی مہم کے دوران ڈونلڈ ٹرمپ نے اشارہ دیا تھا کہ اگر وہ دوبارہ منتخب ہوئے تو ایلون مسک کو اپنی کابینہ میں جگہ دے سکتے ہیں یا مشیر بناسکتے ہیں۔
