18 دسمبر ، 2024 
کرک: خواتین کا گیس آنے تک بچوں کو پولیو سے بچاؤ کے قطرے پلانے سے انکار، ٹیم علاقے سے نکال دی
18 دسمبر ، 2024
خیبرپختونخوا کے ضلع کرک میں خواتین نے گیس کی بندش کے خلاف پولیو مہم کا بائیکاٹ کردیا۔
خواتین نے گیس آنے تک بچوں کو پولیو سے بچاؤ کے قطرے پلانے سے انکار کردیا اور پولیو ٹیم کو علاقے سے باہر نکال دیا۔
خواتین کا کہنا ہے کہ گیس کی فراہمی تک انسداد پولیو مہم کا بائیکاٹ جاری رہے گا۔
اس حوالے سے ڈپٹی کمشنر شکیل احمد کا کہنا تھاکہ کرک میں خواتین کو گیس کا مسئلہ 2 دن میں حل کرنے کی یقین دہانی کرائی ہے۔
انہوں نے کہا کہ پولیو مہم ضلع بھر میں جاری ہے اور اس حوالے سے سوئی نادرن حکام سےبات ہوگئی ہے اور انہوں نے بھی گیس فراہم کرنے کی یقین دہانی کرادی ہے۔
خیال رہے کہ ملک میں انسداد پولیو مہم جاری ہے اور گھر گھر جا کر بچوں کو پولیو کے قطرے پلائے جا رہے ہیں۔
ملک میں رواں سال پولیو کیسز میں اضافہ ہوگیا ہے اور اب تک 63 کیسز کی تصدیق ہوئی ہے جن میں سے بلوچستان میں 26، خیبرپختونخوا سے 18، سندھ سے 17، پنجاب اور اسلام آباد سے ایک ایک کیس شامل ہے۔
