18 دسمبر ، 2024 
خیبرپختونخوا میں سکیورٹی فورسز کی 3 مختلف کارروائیوں میں 11 خوارج ہلاک
18 دسمبر ، 2024
خیبرپختونخوا میں سکیورٹی فورسز کی 3 مختلف کارروائیوں میں 11 خوارج ہلاک ہوگئے۔
پاک فوج کے شعبہ تعلقات عامہ(آئی ایس پی آر) کے مطابق خوارج کے خلاف انٹیلی جنس بیسڈ آپریشنز 17 اور 18 دسمبر کو کیے گئے۔
آئی ایس پی آر نے بتایا کہ سکیورٹی فورسز نے ضلع ٹانک میں خفیہ اطلاع پر انٹیلی جنس بیسڈ آپریشن کیاجس کے دوران سکیورٹی فورسز نے خوارج کے ٹھکانے کو مؤثر طریقے سے نشانہ بنایا۔
آئی ایس پی آر کے مطابق ٹانک میں آپریشن کے دوران 7 خوارج ہلاک ہوئے۔
آئی ایس پی آر نے بتایا کہ سکیورٹی فورسز نے ایک اور آپریشن شمالی وزیرستان کے علاقے دتہ خیل میں کیا،جس میں فائرنگ کے تبادلے میں سکیورٹی فورسز نے 2 خوارج کو ہلاک کیا۔
آئی ایس پی آر کے مطابق سکیورٹی فورسز نے تیسری کارروائی ضلع مہمند کے علاقے مامدگٹ میں کی،جس میں بھی شدید فائرنگ کے تبادلے کے بعد 2 خوارج کو ہلاک کر دیا گیا۔
آئی ایس پی آر کا کہنا ہے کہ ہلاک خوارج کے قبضے سے اسلحہ اور گولہ بارود بھی برآمد ہوا، ہلاک خوارج سکیورٹی فورسز اور معصوم شہریوں کے خلاف متعدد دہشت گردانہ کارروائیوں میں ملوث تھے۔
آئی ایس پی آر کا کہنا ہے کہ سکیورٹی فورسز ملک سے دہشت گردی کی لعنت ختم کرنے کیلئے پرعزم ہیں۔
