22 دسمبر ، 2024 
پولیس کے دعوے کے برعکس صادق آباد کے 2 مغویوں نے اپنی بازیابی تاوان کے بدلے قرار دیدی
22 دسمبر ، 2024
پنجاب کے ضلع رحیم یار خان کی تحصیل صادق آباد کے دو مغویوں نے اپنی بازیابی تاوان کے بدلے قرار دے دی۔
12 روز قبل کشمور روڈ سے صادق آباد کے اغوا کیے گئے سراج احمداور رحمت اللہ کوگزشتہ روزرحیم یار خان پولیس نے ٹارگٹڈ آپریشن کے ذریعے بازياب کرانے کا دعویٰ کیا تھا۔
تاہم اب بازیاب ہونے والوں کا کہنا ہے کہ ان کی رہائی 20 لاکھ 10 ہزار تاوان کے بدلے ہوئی۔
مغویوں کا کہنا تھا کہ ایس ایچ او یوسف ملی ڈاکوؤں کے ساتھ رابطے میں تھا۔
اس حوالے سے ڈی پی او رحیم یار خان کا کہنا ہے کہ بازیاب ہونے والوں سے مخصوص ایجنڈے کے تحت بیان دلائے جا رہے ہیں، پولیس نے مغویوں کی بحفاظت بازیابی کی اطلاع ان کے رشتہ داروں کودی تھی۔
اُدھر صادق آباد سے پیپلز پارٹی کے ایم پی اے ممتاز چانگ کا کہنا ہے کہ مغویوں کی بازیابی تاوان کے بدلے ہونا پولیس کے منہ پر طمانچہ ہے، پہلے ہی کہا تھا کہ پولیس اور کچے کے ڈاکوؤں کا گٹھ جوڑہے، پولیس میں موجود کالی بھیڑیں لوگوں کے اغوا میں ملوث ہیں۔
