مودی کا جِل بائیڈن کو ہزاروں ڈالرز مالیت کا تحفہ، امریکی حکام کو ملنے والے تحائف کی تفصیلات جاری

واشنگٹن: امریکی محکمہ خارجہ کی 2023 کی غیر ملکی تحائف کی سالانہ رپورٹ جاری کردی گئی۔

رپورٹ کے مطابق امریکی صدر جوبائیڈن، خاتون اول جل باہیڈن اور امریکی خفیہ اہلکاروں کو لاکھوں ڈالرز کے تحائف ملے۔

بھارتی وزیراعظم نریندر مودی نے امریکی حکام کو سب سے مہنگا تحفہ دیا، نریندر مودی نےامریکی خاتون اول جِل بائیڈن کو20 ہزارڈالر کا ہیرا تحفے میں دیا۔

اس کے علاوہ بھارتی اہلکاروں نے امریکی خفیہ ایجنسی کے اہلکار کو کشمیر میں تیار کردہ تحائف دیے۔

 بھارتی قومی سلامتی کے مشیر اجیت دوول نے امریکی قومی سلامتی کے مشیر جیکب سلیوان کو  تحائف دیے۔

رپورٹ کے مطابق جیکب سلیوان کو چاندی کا مجسمہ جنوری 2023 میں دیا گیا جبکہ جولائی 2023 میں لکڑی سے تیار کیا گیا ہاتھی کا مجسمہ بطور تحفہ دیا گیا۔

وزیراعظم پاکستان شہباز شریف کی طرف سے جوبائیڈن کو 2022 میں قالین کا تحفہ دیا گیا جس کی مالیت 525 ڈالر  تھی۔

2023 میں پاکستانی سفیر مسعود خان کی طرف سے امریکی حکومتی سینئر ڈائریکٹر ایلیئن لوباکر کو 600 ڈالرز مالیت کا قالین بطور تحفہ پیش کیا گیا۔

رپورٹ کے مطابق امریکی خفیہ ایجنسی کے ملازمین کو 2023 میں ایک لاکھ 32 ہزار ڈالر مالیت کے تحائف ملے۔

سی آئی اے کے ڈائریکٹر ولیم برنز کو بھی  18 ہزار ڈالرز مالیت کا ٹیلی اسکوپ کیمرہ تحفے میں ملا۔

رپورٹ میں بتایا گیا ہے کہ امریکی خفیہ ایجنسی کے اہلکاروں کو قیمتی گھڑیاں، ہیرے کے زیورات اور پرفیوم تحائف میں ملے۔

لیبیا کے بزنس مین نے 30 ہزار ڈالرز مالیت کا جیولری گفٹ امریکی خفیہ ایجنسی کے اہلکار کو دیا۔

امریکی قانون کے مطابق 480 ڈالرز سے زیادہ مالیت کے تحائف کو رپورٹ کرنا ضروری ہوتا ہے اور اہم یا تاریخی تحائف کو نیشنل آرکائیوز  یا جنرل سروسز ایڈمنسٹریشن منتقل کردیا جاتا ہے۔