شہباز شریف نے 3 بار وزارت عظمیٰ کی پیشکش ٹھکرائی، بھائی سے بیوفائی نہیں کی: مریم اورنگزیب

پاکستان مسلم لیگ (ن) کی مرکزی سیکرٹری اطلاعات اور پنجاب کی سینیئر وزیر مریم اورنگزیب نے پشتونخوا ملی عوامی پارٹی کے سربراہ محمود اچکزئی کے وزیراعظم شہباز شریف سے متعلق بیان پر افسوس کا اظہار کیا۔

اپنے بیان میں مریم اورنگزیب کا کہنا تھا کہ محمود اچکزئی جیسے سینیئر اور قابل احترام سیاستدان سے ایسی خلاف حقیقت گفتگو کی توقع نہیں تھی۔

انہوں نے کہاکہ تاریخ گواہ ہے شہباز شریف نے تین بار وزارت عظمیٰ کی پیشکش ٹھکرائی لیکن بڑے بھائی سے بے وفائی نہیں کی، شہباز شریف نہ صرف اپنے بھائی کے ساتھ ہر طوفان میں ڈٹ کر کھڑے رہے بلکہ ہمیشہ ان کے ساتھ جیل بھی گئے، بدترین صعوبتیں برداشت کیں۔

مریم اورنگزیب کا کہنا تھاکہ نواز شریف اور شہباز شریف کے مخلص برادرانہ رشتے میں دراڑ کی قیاس آرائیاں چالیس سال سے جاری ہیں جو ہمیشہ جھوٹ اور پروپیگنڈا ثابت ہوئیں۔

شہباز ہمارے دوست ہیں مگر وہ مشرف کے وزیراعظم بننے کیلئے بھی تیار تھے: محمود اچکزئی کا دعویٰ

جس حکومت کے پاس جائز مینڈیٹ ہی نہیں ہے اس سے کس بات کے مذاکرات ہورہے ہیں؟ سربراہ اپوزیشن اتحاد

انہوں نے مزید کہاکہ شہباز شریف واحد مثال ہیں، وزیراعظم کی کرسی پر بھائی کی وفاداری کو ترجیح دی، شہبازشریف اخلاص کے امتحان میں ہمیشہ کھرے اترے ہیں۔

دوسری جانب مسلم لیگ ن کے رہنما حنیف عباسی نے محمود خان اچکزئی کے بیان پر ردعمل دیتے ہوئے کہاکہ ایسے وقت میں جب مغربی سرحد پر پاکستان نے دراندازی کا منہ توڑ جواب دیا، محمود خان دراندازی کرنے والوں کی ہمدردی میں بات کر رہے ہیں۔

انہوں نے کہا کہ شہبازشریف کی اپنے بھائی سے وفاداری پربات کرنے سے پہلے محمود اچکزئی اپنے گریبان میں جھانکیں، مشرف کی وزیراعظم بننے کی پیشکش کو شہباز شریف نے ٹھکرادیا تھا، اپنے بھائی کا ہرمشکل میں ساتھ دینے والے شہبازشریف نے قیدوبند برداشت کیں، جھوٹ اورمکرمحمود اچکزئی کا وتیرہ بن گیا،کبھی سچ سے بھی کام لے لیا کریں۔

خیال رہے کہ آج اسلام آباد میں میڈیا سے گفتگو میں محمود اچکزئی نے دعویٰ کیا تھاکہ شہباز شریف ہمارے دوست ہیں مگر وہ تو مشرف کے وزیراعظم بننے کیلئے بھی تیار تھے۔

انہوں نے کہا کہ نوازشریف نے ہمت کرکے شہباز شریف کو روکا تھا مگر اب نوازشریف بھی پیچھے ہٹ گئے ہیں۔