02 فروری ، 2025 
8 فروری سے متعلق جنید اکبر کی زیرصدارت اجلاس، پی ٹی آئی پشاور ریجن کے کئی ارکان اسمبلی اور عہدیدار غائب رہے
02 فروری ، 2025
پاکستان تحریک انصاف (پی ٹی آئی) کے خیبرپختونخوا کے صدر جنید اکبر کی زیرصدارت 8 فروری کے جلسے سے متعلق اجلاس میں پشاور ریجن کے کئی اراکین اسمبلی اور پارٹی عہدیدار غائب رہے۔
صوابی میں 8 فروری کے جلسے سے متعلق پی ٹی آئی خیبرپختونخوا کے صدر جنید اکبر کی زیرصدارت اجلاس ہوا جس میں حکمت عملی طے کی گئی۔
وزیراعلیٰ خیبرپختونخوا علی امین گنڈاپور اجلاس میں شریک نہیں ہوئے، اجلاس میں شرکت کیلئے وزیراعلیٰ کو دعوت بھی نہیں دی گئی۔
اجلاس میں صوبائی وزرا مینا خان، قاسم خان، مشیر صحت احتشام خان، پی ٹی آئی ارکان اسمبلی شیرعلی ارباب، شاندانہ گلزار اوردیگر اجلاس میں شریک ہوئے۔
پشاور ریجن کے کئی اراکین اسمبلی اور پارٹی عہدیدار اجلاس سے غائب رہے۔ ذرائع کے مطابق اجلاس میں صوابی کا جلسہ ہر صورت کامیاب بنانے کا فیصلہ ہوا۔ ذرائع کا کہنا ہے کہ جنید اکبر نے اجلاس میں گفتگو کی کہ بانی پی ٹی آئی کی رہائی کیلئے پہلے قانونی تمام راستے اختیار کریں گے۔
انہوں نے کہا کہ اب بھرپور احتجاج ہوگا، کسی کے کہنے پر احتجاج ختم نہیں ہوگا، کسی کو ٹارگٹ نہیں دوں گا، سب رہنما زیادہ سے زیادہ کارکن جلسہ گاہ پہنچائیں، تب تک اسٹیج نہیں جاؤں گا جب تک تمام رہنما جلسہ گاہ پہنچ نا جائیں، گاڑیوں کا بندوبست ضلعی رہنما کریں گے۔
جنید اکبر کا کہنا تھاکہ سب مل کر پارٹی کیلئے کام کریں گے، ماضی کے غلطیوں کو دوبارہ نہیں دہرائیں گے۔
خیال رہے کہ پاکستان تحریک انصاف نے 8 فروری کو یوم سیاہ کا اعلان کر رکھا ہے اور 8 فروری کو صوابی میں جلسہ ہوگا۔
