بورڈ نے بڑے نام تو جمع کر لیے لیکن کرکٹ کے معاملات مسلسل خراب ہو رہے ہیں،کامران اکمل

سابق ٹیسٹ وکٹ کیپر کامران اکمل نے آئی سی سی چیمپئنز ٹرافی میں پاکستان ٹیم سلیکشن پر شدید تحفظات کا اظہار کرتے ہو ئے کہا ہے کہ سلیکشن کمیٹی شدید کشمکش کا شکار دکھائی دیتی ہے۔

جیو نیوز کے پروگرام "اسکور" میں گفتگو کرتے ہوئے پاکستان کرکٹ ٹیم کے سابق ٹیسٹ وکٹ کیپر کا کہنا تھا کہ اتنی تاخیر سے آئی سی سی چیمپئنز ٹرافی کے لیے 15 رکنی ٹیم کا اعلان اور پھر ٹیم میں حیران کن کھلاڑیوں کی شمولیت سے سوالات کا اٹھنا ایک درست سوال ہے۔

2002 سے 2017 تک پاکستان کے لیے بین الااقوامی کرکٹ میں 268 میچز کھیلنے والے کامران اکمل کاکہنا ہے کہ کسی کی نیت پر شک نہیں کیا جاسکتا،سب کھلاڑی پاکستان کے ہیں ،البتہ اگر ان کھلاڑیوں کو آپ نے چیمپئنز ٹرافی اسکواڈ میں رکھنا تھا تو پھر انہیں پچھلے دوروں میں ٹیم کے ساتھ رکھ لیتے ،اتنی تنقید ہی نہ ہوتی۔

سابق ٹیسٹ وکٹ کیپر نے کہا کہ بورڈ کے فیصلے سجھ سے بالاتر ہیں ،کراچی میں پیڑنز ٹرافی ٹورنامنٹ چل رہا ہے،ایسی صورت میں لاہور میں "پاور ہٹرز" کیمپ لگا کر کیا ثابت کر نے کی کوشش کی جارہی ہے،کیا پیڑنز ٹرافی ٹورنامنٹ کی کوئی اہمیت نہیں ہے،اس ٹورنامنٹ کی سہولیات کو دیکھ کر تو ایسا ہی دکھائی دے رہا ہے۔

کامران اکمل نے تنقید کرتے ہوئے کہا کہ پھرآپ کہتے ہیں کہ ڈومیسٹک کرکٹ کھیلنے میں کھلاڑی دلچسپی نہیں رکھتے،جب آپ فرسٹ کلا س ٹورنامنٹ کے دوران لیگ کرکٹ کھیلنے کے لیے کھلاڑیوں کو "این او سی" دے دیں گے اور بنگلا دیش پریمئیر لیگ کی بنیاد پر ٹیم منتخب کریں گے،تو کون سا کھلاڑی ڈو میسٹک کرکٹ کھیلنے میں دلچسپی کا مظاہرہ کرے گا۔

ٹیسٹ کرکٹ میں پاکستان کی تاریخ کے دوسرے کامیاب ترین وکٹ کیپر کامران اکمل جنہوں نے 53 ٹیسٹ کی 99 اننگز میں 184 کیچز، 22 اسٹپمڈ کے ساتھ مجموعی طور پر 206 شکار کیے،اور وسیم باری کے 228 شکار ( 201 کیچ 27 اسٹپمڈ ) کے بعد پاکستان کے دوسرے کامیاب ترین ٹیسٹ وکٹ کیپر ہیں ،انہوں نے کہا کہ کرکٹ بورڈ نے 5 مینٹورز سلیکشن کمیٹی میں ،سابق کرکڑز قومی ٹیم مینجمنٹ میں، سابق کرکڑز کو شامل کر رکھا ہے،البتہ کام کر نے اور پرفارمنس میں غیر معیاری نتائج کو دیکھ کر صاف نظر آرہا ہے کہ بورڈ کس انداز میں چل رہا ہے۔بورڈ نے بڑے نام تو جمع کر لیے ،لیکن کرکٹ کے معاملات مسلسل خراب ہو رہے ہیں۔

اس کے علاوہ کامران اکمل نے کہاکہ چیمپئنز ٹرافی سے پہلے اسٹیڈیمز کی اپ گریڈیشن کے بعد گنجائش کے ساتھ اسٹیڈیم میں تماشائی سہولیات سے ضرور مستفید ہوں گے اور درحیقیت پاکستان کرکٹ کے لیے یہ ایونٹ ایک سنگ میل ثابت ہوگا۔

چیمپئنز ٹرافی میں پاکستان ٹیم کے امکانات پر گفتگو کرتے ہو ئے کامران اکمل نے کہا کہ بطور پاکستانی کرکٹر وہ خواہش رکھتے ہیں کہ پاکستان ٹیم ایونٹ میں اچھے اور مثبت نتائج کے حصول میں کامیاب ہو۔