پاکستان

ترک صدر رجب طیب اردوان 2 روزہ سرکاری دورے پر پاکستان پہنچ گئے

13 فروری ، 2025

ترک صدر رجب طیب اردوان 2 روزہ سرکاری دورے پر پاکستان پہنچ گئے — فوٹو: پی آئی ڈی

اسلام آباد:‎ترکیے کے صدر رجب طیب اردوان اعلیٰ سطح کے وفد اور ترک خاتون اول کے ہمراہ اسلام آباد پہنچ گئے۔

اعلامیے کے مطابق ترکیے کے صدر رجب طیب اردوان 2 روزہ سرکاری دورے پر پاکستان پہنچے ہیں۔ترکیے کی معروف کاروباری شخصیت بھی ترک صدر کے ہمراہ ہیں۔

اعلامیے میں بتایا گیا کہ صدر مملکت آصف علی زرداری اور وزیراعظم شہباز شریف نے نور خان ائیربیس پر ترکیے کے صدر کا استقبال کیا۔

صدر رجب طیب اردوان کی آمد پر ان کے اعزاز میں 21 توپوں کی سلامی بھی دی گئی۔ روایتی لباس میں ملبوس اسکول کے بچوں نے ترک صدر کو خوش آمدید کہا۔

اس کے علاوہ ملٹری بینڈ نے بھی روایتی انداز میں ترک صدر کا استقبال کیا جبکہ پاکستان کی فضائی حدود میں پاک فضائیہ کے طیاروں نے فضائی استقبال کیا۔

اعلامیے کے مطابق پاک فضائیہ کے جے ایف 17 طیارے ترک صدر کے جہاز کو اپنی حصار میں اسلام آباد لائے۔

واضح رہے کہ ‎صدر اردوان وزیراعظم شہباز شریف اور صدر آصف علی زرداری سے ملاقاتیں بھی کریں گے۔

وزیراعظم شہباز شریف اور صدر اردوان پاک ترک اعلیٰ سطح اسٹریٹجک کوآپریشن کونسل اجلاس کی مشترکہ صدارت کریں گے۔متعدد اہم معاہدوں اور ایم او یوز پر بھی دستخط متوقع ہیں۔

وزیر اعظم شہباز شریف نے بیان میں کہاکہ صدر اردوان کی قیادت میں پاک ترک برادرانہ تعلقات مضبوط تر ہوتے جارہے ہیں، صدر اردوان کے تاریخی دورے پر ہم ان مضبوط تعلقات کو مزید بلندیوں تک پہنچانے کے خواہشمند ہیں۔