17 فروری ، 2025 
جدید سکیورٹی کیمرے، گاڑیاں اور آٹو میٹک گیٹ، مصطفیٰ قتل کیس کے ملزم ارمغان کے گھر اور کیا ہے؟
17 فروری ، 2025
کراچی: اغوا کے بعد قتل ہونے والے نوجوان مصطفیٰ قتل کیس کے ملزم ارمغان کے گھر جیونیوز پہنچ گیا۔
ڈیفنس خیابان مومن میں ملزم کے گھر جدید سیکیورٹی کیمرے، گاڑیاں اور آٹو میٹک گیٹ لگا ہے، دیواروں پر گولیوں کے نشانات بھی موجود ہیں۔
ملزم ارمغان نے پہلی منزل پر سافٹ ویئر ہاؤس بھی بنا رکھا تھا، واک تھرو گیٹ بھی نصب تھا جبکہ کمرے کے قالین پر موجود خون کے نمونے مقتول مصطفیٰ کی والدہ سے میچ ہو چکے ہیں۔
8 فروری کو ملزم نے پولیس چھاپے کے دوران گھر کے اندر سے جدید ہتھیاروں سے فائرنگ کی تھی، جس میں ڈی ایس پی سمیت 3 پولیس اہلکار زخمی ہوئے تھے۔
پولیس کے مطابق ملزم ارمغان کے گھر پر چھاپے کے دوران اسلحہ بھی برآمد کیا گیا ہے جس کی جانچ سی ٹی ڈی کرے گا۔
یاد رہے کہ بلوچستان پولیس نے 11 جنوری کو حب سے جلی ہوئی حالت میں گاڑی سے ملنے والی ایک لاش فلاحی ادارے کے حوالے کی تھی اور اس حوالے سے فلاحی ادارے کے سربراہ نے جیو نیوز کو بتایا تھا کہ لاش کے ہاتھ پاؤں اور سر نہیں تھا، صرف دھڑ تھا جسے 4 روز بعد امانتاً دفنا دیا گیا تھا۔
اب کراچی پولیس نے جوڈیشل مجسٹریٹ نے امانتاً دفنائی گئی لاش کی قبر کشائی کے احکامات جاری کر دیے ہیں جبکہ ارمغان کے زیر حراست ساتھی شیراز نے مصطفیٰ کے قتل کا اعتراف کرتے ہوئے بتایا کہ ارمغان نے زندہ حالت میں مصطفیٰ کی گاڑی کو پیٹرول چھڑک کر آگ لگائی تھی۔
مزید خبریں :
سرگودھا میں جائیداد کے تنازع پر تین خواتین قتل
20 فروری ، 2025
