پاک بھارت ٹاکرا میں شائقین کا جوش و خروش، دبئی اسٹیڈیم کے دروازے مقررہ وقت سے قبل کھولنے پڑے

دبئی کرکٹ اسٹیڈیم آج پاک بھارت کرکٹ میچ کی وجہ سے دنیائے کرکٹ کی توجہ کا مرکز ہے۔

شائقین کرکٹ کے جوش و خروش کا یہ عالم ہے کہ صبح آٹھ بجے سے ہی لوگوں نے اسٹیڈیم کا رخ کر لیا حالانکہ انتظامیہ کی جانب سے اسٹیڈیم کے دروازے گیارہ بجے کھلنے کا اعلان کیا گیا تھا لیکن شائقین کے بے پناہ جوش و خروش نے انتظامیہ نے اسٹیڈیم گیٹس کئی گھنٹے پہلے ہی کھول دیے۔

صبح کے وقت ہی اسٹیڈیم کے اطراف گہما گہمی شروع ہو گئی تھی۔ بچوں، خواتین اور جوانوں سمیت ہر عمر کے شائقین کی بڑی تعداد اپنی اپنی ٹیموں کی شرٹس پہنے اسٹیڈیم کے باہر موجود تھی۔

تھوڑی دوپہر ہوئی تو سورج نے اپنا اثر جمانا شروع کیا اور دبئی کی چلچلاتی دھوپ کے باوجود لوگوں کے چہروں پر مسکراہٹ اور جوش نظر آیا اور قطاروں کا سلسلہ بھی بڑھتا گیا۔

رات کی نیند قربان کرنے والے کئی شائقین نے جیو نیوز سے بات کرتے ہوئے کہا کہ اس تاریخی میچ نے ان کو رات بھر سونے بھی نہیں دیا۔ ایک پاکستانی نوجوان نے کہاکہ ’یہ پاک بھارت میچ کرکٹ نہیں بلکہ ایک تہوار ہے، ہم رات بھر جاگتے رہے اور صبح جلدی پہنچ گئے تاکہ اپنی ٹیم کو سپورٹ کر سکیں‘۔

دلچسپ بات یہ ہے کہ کئی پاکستانی شائقین بھارتی اسٹار ویرات کوہلی کے بھی فین نکلے۔ ایک شائق نے کہاکہ ’ویرات کوہلی کی بیٹنگ دیکھنے کا الگ ہی مزہ ہے لیکن ہم چاہتے ہیں کہ آج شاہین شاہ آفریدی ان کی وکٹ جلد لے‘۔

جب ٹیم پاکستان اور ٹیم انڈیا گراؤنڈ میں داخل ہوئیں تو پورا اسٹیڈیم نعروں اور ترانوں سے گونج اٹھا۔ پاکستانی شائقین نے "پاکستان زندہ باد" کے فلک شگاف نعرے لگائے جبکہ بھارتی شائقین نے اپنی ٹیم کے ترانے گا کر جوش و خروش کا اظہار کیا۔

اسٹیڈیم کے اندر موجود شائقین نے اپنے پسندیدہ کھلاڑیوں کا زبردست استقبال کیا۔ بابر اعظم اور شاہین شاہ آفریدی کے لیے الگ ہی جوش نظر آیا اور ان کے میدان میں آتے ہی نعرے گونجنے لگے۔ دونوں ٹیموں کے شائقین اپنے کھلاڑیوں کی حمایت میں کوئی کسر نہیں چھوڑی۔

دبئی کرکٹ اسٹیڈیم اس وقت نہ صرف کرکٹ بلکہ جذبات، جوش، اور محبت کا مرکز بنا ہوا ہے۔ کرکٹ کا کھیل ایک بار پھر ثابت کر رہا ہے کہ پاک بھارت کرکٹ مقابلہ صرف ایک کھیل نہیں بلکہ لاکھوں دلوں کی دھڑکن ہے۔