24 فروری ، 2025 
کوہلی کی جانب سے میچ کے دوران ابرار کی بولنگ کی تعریف، ویڈیو وائرل
24 فروری ، 2025
آئی سی سی چیمپئنز ٹرافی کے ہائی وولٹیج میچ میں ویرات کوہلی کی شاندار سنچری کی بدولت بھارت نے پاکستان کو 6 وکٹوں سے ہرا دیا ۔
انتہائی اہم میچ میں ویرات کوہلی نے پاکستان کے خلاف چوتھی اور اپنے ون ڈے کریئر کی 51 ویں سنچری اسکور کی۔
ویرات کوہلی نے 111گیندوں پر 7 چوکوں کی مدد سے 100 رنز بنائے اور ناقابل شکست رہے۔ شاندار بلے بازی پر انہیں مین آف دی میچ کا ایوارڈ دیا گیا۔
سوشل میڈیا پر ویرات کوہلی کی شاندار بیٹنگ کی تعریفوں کے ساتھ ان کے بہترین رویے اور اسپورٹس مین اسپرٹ کی بھی تعریف ہورہی ہے۔
میچ میں پاکستان کے بیٹرز اور بولرز خاطر خواہ کارکردگی کا مظاہرہ نہیں کرسکے جس پر انہیں تنقید کا سامنا ہے تاہم مسٹری اسپنر ابرار احمد جنہوں نے 10 اوورز میں 28 رنز دیکر ایک وکٹ لی ان کی تعریفیں بھی کی جارہی ہیں۔
ابرار احمد نے اِن فارم بیٹر شبمن گل کو بولڈ کرکے سب کی تعریفیں سمیٹیں اور کمنٹیٹرز نے اُن کی اُس گیند کو بہترین گیند قرار دیا جب کہ آئی سی سی کے آفیشل فیس بک پیج نے فالوورز سے سوال کیا کہ کیا یہ ٹورنامنٹ کی بہترین گیند تھی؟
بہترین گیند بازی پر ویرات کوہلی بھی ابرار کو شاباشی دیے بغیر نہ رہ سکے۔ بھارت کی اننگز کے 37 ویں اوور میں ابرار نے ایک رنز دیا، اوور کے اختتام پر کوہلی نے ابرار کو روکا اور ان کی بولنگ کی تعریف کی اور پیٹھ تھپتھپائی۔ آئی سی سی کی جانب سے فیس بک پر اس کی ویڈیو بھی شیئر کی گئی ہے۔
اس کے علاوہ میچ ختم ہونے کے بعد بھی کوہلی نے ابرار کو شاباش دی۔
مزید خبریں :
انگلینڈ کے اہم بولر چیمپئنز ٹرافی سے باہر ہوگئے
2 گھنٹے پہلے
بھارتی کپتان روہت شرما نے سچن ٹنڈولکر سے اہم اعزاز چھین لیا
24 فروری ، 2025
