افطار میں بنائیں مزیدار چکن چیز رول

چکن چیز رول ہر عمر کے افراد کو پسند ہے جسے گھر پر آسانی سے بنایا جاسکتا ہے۔

اس مزیدار چکن چیز رول کو بنانے کیلئے آپ کو چند اشیاء کی ضرورت ہوگی جو درج ذیل ہے۔

اجزا: چکن بریسٹ آدھا کلو ،ادرک، لہسن کا پیسٹ ایک کھانے کا چمچہ، چیڈر چیز 100 گرام، درمیانی پیاز ایک عدد،کالی مرچ کٹی ہوئی آدھا چائے کا چمچہ، مسٹرڈ پیسٹ آدھا چائے کا چمچہ، سر کہ 2 چائے کے چمچے، چلی ساس 2 چائے کے چمچے، سویا ساس 2 چائے کے چمچے، اجوائن آدھا چائے کا چمچہ، ہری مرچیں 3 سے 4 عدد ،ہرا دھنیا آدھی گٹھی، ڈبل روٹی کے سلائس 3 عدد، انڈے 2 عدد، ڈبل روٹی کا چورا حسب ِضرورت، میدہ 2 کھانے کے چمچے، کارن فلور 2 کھانے کے چمچے، نمک حسبِ ضرورت اور تیل بھی حسب ِضرورت ہے۔

ترکیب: فرائی پین میں ایک کھانے کا چمچہ تیل ڈال کر اس میں ادرک لہسن کا پیسٹ شامل کرکے درمیانی آنچ پر ایک سے 2 منٹ تک فرائی کریں، پھر اس میں چکن کی چھوٹی چھوٹی بوٹیاں ڈال دیں اور ڈھک کر ہلکی آنچ پر پکائیں۔

جب چکن کا پانی خشک ہو جائے تو اس میں نمک، سرکہ، سویا ساس اور چلی ساس ڈال کر ایک سے 2 منٹ تک پکا کر چولہا بند کردیں۔ چاپر میں ڈبل روٹی کے سلائس، ہرا دھنیا اور ہری مرچیں ڈال کر چاپ کریں، اس کے بعد اس مکسچر کو چاپر سے نکال کر اس میں کالی مرچ اجوائن مسٹرڈ پیسٹ اور ایک پھینٹا ہوا انڈا شامل کریں اور اچھی طرح ملا لیں۔

چیز کو اسٹک کی طرح کاٹ لیں اور چکن مکسچر کا تھوڑا سا حصہ ہاتھ میں رکھیں اور اس کے درمیان میں چیز اسٹک رکھ کر رول بنا لیں۔

 انڈے کو پھینٹ کر اس میں میدہ اور کارن فلور ملا لیں، رول کو پہلے انڈے کے مکسچر میں ڈپ کریں، پھر ڈبل روٹی کا چورا لگا کر کڑاہی میں گرم تیل میں سنہری فرائی کرلیں۔