عوام کہے گی کینالز نامنظور ہیں تو پی پی عوام کیساتھ کھڑی ہوگی: بلاول کا منصوبہ واپس لینے کا مطالبہ

پاکستان پیپلزپارٹی کے چیئرمین بلاول بھٹو زرداری نے کہا ہے کہ اگر عوام کہے گی کہ کینالز نا منظور ہیں تو پی پی عوام کے ساتھ کھڑی ہو گی، شہباز شریف کے ساتھ نہیں۔

گڑھی خدابخش میں جلسے سے خطاب میں بلاول بھٹو زرداری کا کہناتھاکہ آج ہم گڑھی خدابخش میں جمع ہوکر ذوالفقار علی بھٹو کو خراج عقیدت پیش کر رہے ہیں، ہم نے ایک اور تاریخی کامیابی حاصل کی ہے، ذوالفقاربھٹو پہلے پاکستانی ہیں جن کو نشان پاکستان کا اعزاز حاصل ہے، آصف زرداری نے شہید ذوالفقارعلی بھٹو کو انصاف دلایا، تاریخ کی عدالت نے پہلے ہی ذوالفقارعلی بھٹو کو بے گناہ قرار دے دیا تھا اور پچاس سال کی جدوجہد کے نتیجے میں شہید بھٹو کو قانون کی عدالت میں بھی بے گناہ ثابت کردیا۔

انہوں نے کہا کہ آصف زرداری نے شہید ذوالقفار بھٹو کو آئین اصل صورت میں بحال کیا، بے نظیرانکم سپورٹ پروگرام کی صورت میں روٹی کپڑا مکان کا وعدہ پورا کیا، صدر زدراری نے 18 ویں ترمیم کے ذریعے عوام کو اقتدار منتقل کیا، بینظیربھٹو انکم سپورٹ کے ذریعے عوام کی مدد کی جارہی ہے۔

ان کا کہنا تھاکہ 18ویں ترمیم کی وجہ سے سندھ صحت کے شعبے میں دیگر صوبوں سے آگے ہے، 18ویں ترمیم کی وجہ سے سندھ بھر میں صحت کا جال بچھا سکے، گردوں کے علاج کیلئے پہلےلوگ بھارت جاتے تھے، اب گمبٹ جاتے ہیں، ذوالفقاربھٹو نے غریبوں کو زمین کا مالک بنایا، آج میں غریبوں کو گھربھی دے رہا ہوں اور زمین کا مالک بھی بنا رہا ہوں۔

انہوں نے مزید کہا کہ یاد ہے جو 50 لاکھ گھر بنانے کا کہتا تھا، ہم بیس لاکھ گھر بناکر رہیں گے، اپنی چھت اور اپنا گھر پروگرام پیپلزپارٹی کا سب سےبڑا منصوبہ ہے، سیلاب کے دوران دنیا کو قائل کیا کہ ہمارا نقصان موسمیاتی تبدیلی کی وجہ سے ہورہا ہے، دنیا کو قائل کیا کہ موسمیاتی تبدیلی میں قصور ہمارا نہیں آپ کا ہے، سیلاب کے دوران آپ کا وزیرخارجہ تھا،امداد کیلئےدنیا کو قائل کیا، وفاق کو منایا کہ یہ تاریخی قدرتی آفت ہے ایک صوبہ اکیلے مقابلہ نہیں کرسکے گا، گھر منصوبے کو ممکن بنانے میں وفاقی حکومت کا بھی شکرگزار ہوں۔

کینالز منصوبے کے حوالے سے بلاول بھٹو زرداری کا کہا تھاکہ حکومت سے مطالبہ ہے کہ سندھ کے عوام کی آواز سنے، پنجاب کے عوام کی آواز سنے، پانی کی منصفانہ تقسیم ہمارا حق ہے، ہم پاکستان کھپے کہنے والے لوگ ہیں۔

انہوں نے کہا کہ شہبازشریف ہماری بات چھوڑیں یہ عوام کا مطالبہ ہے، عوام کینالز کے خلاف ہوں تو پیپلزپارٹی عوام کے ساتھ کھڑی ہوگی، بھائیوں کو ساتھ رہنا ہے تو متنازع منصوبےکوواپس لینا ہوگا، وزیراعظم کو عوام کے مطالبے پر متنازع منصوبے کو واپس لینا ہوگا۔

ان کا کہنا تھاکہ پیپلزپارٹی عوام کے ساتھ کھڑی ہوگی حکومت کےساتھ نہیں، پیپلزپارٹی حکومت کو کوئی غیر ذمہ دارانہ فیصلہ نہیں لینے دے گی، جب کینالز  قیدی نمبر 804 نے شروع کیے تو پیپلزپارٹی نے آواز اٹھائی باقی سب سوئے ہوئے تھے۔