09 اپریل ، 2025 
بھارتی بورڈ نے آئی پی ایل کھیلنے والے گلین میکسویل پر جرمانہ کیوں کیا؟
09 اپریل ، 2025
آئی پی ایل میں پنجاب کنگز کی طرف سے کھیلنے والے آسٹریلوی کرکٹر گلین میکسویل پر بھارتی کرکٹ بورڈ نے جرمانہ عائد کردیا۔
بھارتی میڈیا کے مطابق میکسویل نے پنجاب کنگز اور چنئی سپر کنگز کے درمیان کھیلے گئے میچ میں آئی پی ایل کے ضابطہ اخلاق کی خلاف ورزی کی جس پر بی سی سی آئی نے میچ فیس کا 25 فیصد جرمانہ عائد کیا۔
بی سی سی آئی نے منگل کی رات جاری کردہ بیان میں کہا کہ پنجاب کنگز کے آل راؤنڈر نے آرٹیکل 2.2 (میچ کے دوران فکسچر اور فٹنگ کا غلط استعمال) کے تحت لیول 1 کے جرم کا اعتراف کیا اور میچ ریفری کی منظوری کو قبول کیا۔
میکسویل کو سزا کیوں دی گئی؟
میکسویل کو ایک ایسے جرم کا مرتکب پایا گیا جو کھلاڑیوں اور ٹیم آفیشلز کے لیے آئی پی ایل کوڈ آف کنڈکٹ کے آرٹیکل 2.2 کے تحت آتا ہے۔
آرٹیکل 2.2 میں کرکٹ کے معمول کے عمل سے باہر کوئی بھی کارروائی شامل ہوتی ہے، یعنی نظم و ضبط کی خلاف ورزی، جیسے وکٹوں کو جان بوجھ کے ٹانگ مارنا اور کوئی بھی ایسا عمل جو جان بوجھ کر، لاپرواہی یا حادثاتی طور پر ہوا ہو، یا کسی قسم کی پراپرٹی کو نقصان پہنچانا، شور مچانا۔
اس آرٹیکل کے قوانین کے مطابق مثال کے طور پر، اس جرم کا مرتکب کھلاڑی اس وقت پایا جاتا ہے جب وہ مایوسی میں اپنے بلے کو زور سے گھماتا ہے اور اشتہاری بورڈ کو نقصان پہنچاتا ہے۔
واضح رہے کہ چنئی سپر کنگز کے خلاف اس میچ میں پنجاب کنگز کو کامیابی ملی تھی۔
