24 جون ، 2025 
ہاکی ٹیم کے کپتان کو 5600 روپے دینے کا معاملہ حل، اسپورٹس بورڈ نے بھی وضاحت کردی
24 جون ، 2025
پاکستان ہاکی ٹیم کے کپتان عماد شکیل بٹ کو پاکستان اسپورٹس بورڈ کی جانب سے 5600 روپے دینے کا معاملہ کلیئر ہوگیا۔
خبر سامنے آئی تھی کہ اسپورٹس بورڈ نے عماد شکیل کو اسلام آباد آنے کے لیے سفر کے 5600 روپے ادا کیے جس پر عماد شکیل نے شکریہ کے ساتھ دعوت مسترد کردی۔
عماد شکیل نے دعوت کو مسترد کرتے ہوئے جواب دیا تھا کہ اتنے پیسے تو ٹول کی ادائیگی پر لگ جاتے ہیں۔
تاہم اب معاملہ کلیئر ہوگیا ہے اور کپتان عماد بٹ کا کہنا ہے کہ انہیں بعد میں کلیئر کیا گیا ہے کہ یہ بھجوائی گئی 5600 روپے کی رقم پاکستان اسپورٹس بورڈ کی جانب سے نیشنز کپ کے کیمپ میں شامل کھلاڑیوں کی پاکٹ منی کے طور پر دی گئی ہے۔
پی ایس بی کے ترجمان کا کہنا ہے کہ کپتان عماد بٹ کی غلط فہمی دور کر دی گئی ہے وہ پروگرام میں شرکت کریں گے یہ کیمپ کی پاکٹ منی ہے یہ سفری اخراجات نہیں۔
خیال رہے کہ پاکستان اسپورٹس بورڈ نے ظہرانے کے لیے قومی ہاکی ٹیم کے 6 کھلاڑیوں کو مدعو کیا جن میں سفیان خان، رانا وحید ،عبداللہ، منیب الرحمان اور حنان شاہد بھی شامل ہیں۔
اس کے علاوہ ظہرانے کے لیے دیگر کھیلوں کے کھلاڑیوں کو بھی مدعو کیا گیا ہے جس میں اولمپک گولڈ میڈلسٹ ارشد ندیم اور نوح دستگیر بھی شامل ہیں۔
