واٹس ایپ میں ایک بہترین اے آئی فیچر صارفین کیلئے متعارف

26 جون ، 2025

واٹس ایپ میں ایک بہترین اے آئی فیچر صارفین کیلئے متعارف — کمپنی نے اس فیچر کا اعلان کیا / فوٹو بشکریہ میٹا

واٹس ایپ میں آرٹی فیشل انٹیلی جنس (اے آئی) پر مبنی ایک نیا فیچر متعارف کرایا گیا ہے جو آپ کو ضرور پسند آئے گا۔

یہ فیچر چیٹس میں موجود پیغامات کی مختصر سمری تیار کرکے فراہم کرے گا۔

اس فیچر کا بنیادی مقصد صارفین کو مدد فراہم کرنا ہے تاکہ وہ متعدد ان ریڈ (unread) پیغامات کو پورا پڑھ کر وقت ضائع نہ کریں۔

اس فیچر کے لیے میٹا اے آئی کو پرائیویٹ طریقے سے استعمال کیا جاسکے گا جس کی جانب سے مختلف چیٹس میں موجود طویل پیغامات کے اہم نکات کی سمری فراہم کی جائے گی۔

یہ بھی پڑھیں

کمپنی نے ایک بلاگ پوسٹ میں بتایا کہ اس ٹول سے صارفین کو یہ جاننے میں بھی مدد ملے گی کہ کسی چیٹ میں کس موضوع پر بات چیت کی جا رہی ہے تاکہ وہ اس کے مطابق پیغامات کا جواب دے سکیں۔

جب بھی یہ فیچر صارفین کو دستیاب ہوگا تو انہیں ان ریڈ میسجز کے اوپر سمریز پرائیویٹلی کا آپشن نظر آئے گا۔

اس آپشن پر کلک کرنے پر میٹا اے آئی چیٹ بوٹ متحرک ہوگا اور ان پیغامات کے اہم نکات بیان کرے گا۔

اس فیچر کے لیے میٹا کی پرائیویٹ پروسیسنگ ٹیکنالوجی پر انحصار کیا جائے گا تاکہ صارفین کا ڈیٹا واٹس ایپ، میٹا یا کسی تھرڈ پارٹی کے پاس نہ پہنچ سکے۔

کمپنی نے یقین دہانی کرائی ہے کہ پیغامات کی تیار کردہ سمری صارف تک محدود ہوگی جبکہ پرائیویسی کو مزید بہتر بنانے کے لیے فی الحال اسے گروپ چیٹس کا حصہ نہیں بنایا جا رہا۔

کمپنی نے بتایا کہ اے آئی چیٹ سمری کا فیچر آپشنل ہے اور صارف کو اسے استعمال کرنے کے لیے خود ٹرن آن کرنا ہوگا۔

یہ فیچر ابتدائی طو پر امریکا میں متعارف کرایا گیا ہے اور رواں سال کے دوران اسے دیگر ممالک تک توسیع دی جائے گی۔