کراچی…متحدہ قومی موومنٹ کی رابطہ کمیٹی نے جنوبی پنجاب کے علاقے بھکرمیں امام بارگاہ اورشہریوں کے گھروں پرحملے اور اسلام آبادمیں مدرسے پر فائرنگ کے واقعات کی شدید مذمت کی ہے اوران واقعات میں بے گناہ شہریوں کے شہیدوزخمی ہونے پرگہرے دکھ اور افسوس کااظہار کیا ہے ۔ ایک بیان میں رابطہ کمیٹی نے کہاکہ دہشت گرد عناصر ملک بھرمیں فرقہ وارانہ ہم آہنگی کو نقصان پہنچانے کی سازش کررہے ہیں ، بھکراور اسلام آباد میں دہشت گردی کے واقعات اسی سازش کا حصہ ہیں۔ رابطہ کمیٹی نے وزیراعظم پاکستان میاں نوازشریف، وفاقی وزیرداخلہ چوہدری نثارعلی خان اوروزیراعلیٰ پنجاب میاں شہباز شریف سے مطالبہ کیا کہ بھکر اور اسلام آباد میں دہشت گردی کے واقعات کا فوری نوٹس لیاجائے ، بے گناہ شہریوں پرمسلح حملے کرنے والے دہشت گردعناصر کوگرفتارکرکے سخت ترین سزا دی جائے اور شہریوں کی جان ومال کے تحفظ کیلئے ٹھوس اور عملی اقدامات کئے جائیں ۔رابطہ کمیٹی نے بھکر اور اسلام آباد میں دہشت گردی کے واقعات میں جاں بحق ہونے والے افراد کے سوگوارلواحقین سے دلی تعزیت وہمدردی کا اظہارکیا اور زخمیوں کی جلد ومکمل صحت یابی کیلئے دعا بھی کی ۔