دبئی …پاکستان اور انگلینڈ کے درمیان یہاں دبئی انٹرنیشنل کرکٹ اسٹیڈیم میں کھیلے جانے والے پہلے کرکٹ ٹیسٹ میں تیسرے ہی دن پاکستان نے انگلینڈ کو 10 وکٹوں سے ہراکر تین ٹیسٹ میچز کی سیریز میں 1-0کی برتری حاصل کرلی ہے،آج پاکستان کی جیت میں گو کہ تین بولروں عمر گل سعید اجمل اور عبد الرحمن نے اہم کردار ادا کیا تاہم میچ کی کامیابی میں مرکزی کردار جادو گر اسپنر سعید اجمل نے اد ا کیا اور میچ میں دس وکٹیں اپنے نام کرکے نہ صرف گرین شرٹس کو سرخرو کیابلکہ میچ کے بہترین کھلاڑی کا اعزاز بھی اپنے نام کیا۔ اس سے قبل انگلش ٹیم اپنی دوسری اننگز میں صرف 160 پر ڈھیر ہوگئی، اور گرین شرٹس کو کامیابی کے لیے صرف 15کا ہدف ملا، جو کہ اوپنرز محمد حفیظ اور توفیق عمر نے بنا کسی نقصان کے چوتھے اوور میں ہی حاصل کرلیا۔انگلش ٹیم کی جانب سے سوائے جوناتھن ٹروٹ 49اور گریم سوان 39کے کوئی بیٹسمین مصباح اینڈکمپنی کے سامنے مزاحمت نہ کرسکا اور یکے بعد دیگرے اپنی وکٹیں عمرگل،سعید اجمل اور عبدالرحمن کو تھما کر پویلین لوٹتے رہے۔گوکہ گرین شرٹ قائد کی خواہش تھی کہ انگلش سائیڈ کا غرور توڑنے کے لیے انھیں کم ازکم اننگ کی شکست دی جائے مگر گریم سوان اور آخری تین انگلش ٹیل اینڈرز گرین شرٹس کی راہ میں حائل ہوگئے اور اپنی ٹیم کو اننگز کی شکست سے تو بچانے میں کامیاب ہوئے البتہ مکمل شکست سے نہ بچا سکے۔یاد رہے کہ انگلش ٹیم نے اپنی پہلی اننگز میں 192رنز بنائے تھے