جوہانسبرگ…عظیم عالمی رہنما نیلسن منڈیلا کی تدفین ان کے آبائی گاوٴں میں کردی گئی،آخری رسومات میں دنیا بھر سے رہنماوٴں کی شرکت کی۔جنوبی افریقہ کے پہلے سیاہ فام صدر آنجہانی نیلسن منڈیلا کو ان کے آبائی قصبے کونو میں سپردِ خاک کر دیا گیا ہے۔نیلسن منڈیلا 5 دسمبر کو 95 برس کی عمر میں انتقال کر گئے تھے اور ان کی یاد میں تقریبات دس دن سے جاری تھیں، ان کی تدفین ان کے آبائی گاؤں کونو میں کردی گئی، ان کی تدفین کی تقریب کے موقع پر نیلسن منڈیلا کی بیوہ گراکا مشیل، جنوبی افریقہ کے صدر جیکب زوما اور اہم غیر ملکی شخصیات سمیت تقریباً ساڑھے چار ہزار افراد شریک ہوئے، اس تقریب میں متعدد سیاسی اور مذہبی شخصیات نے تقاریر میں نیلسن منڈیلا کو خراجِ تحسین پیش کیا،اس موقع پر جیکب زوما نے کہا کہ جنوبی افریقا کے عوام کو منڈیلا کی روایات کو آگے بڑھانا ہوگا۔ تقریب کے بعد منڈیلا کے تابوت کو فوجی جوان خصوصی شامیانے سے پہاڑی پر واقع قبرستان لے گئے جہاں انہیں دفن کر دیا گیا،تقریب میں شرکت کیلئے افریقی ممالک کے صدور، متعدد وزرائے اعظم، ایرانی نائب صدر اور برطانوی ولی عہد شہزادہ چارلس بھی کونومیں موجود تھے۔