کراچی…متحدہ قومی موومنٹ کے قائد الطاف حسین کی ہدایت پرایم کیوایم کے مرکز نائن زیرو اور خدمت خلق فاؤنڈیشن میں صحرائے تھرمیں قحط زدہ افراد کی امداد کے کیلئے قائم کردہ کیمپوں سے قحط سے متاثرہ خاندانوں کے لیے دو ٹرکوں پر مشتمل غذائی اجناس و دیگرروز مرہ استعمال کی اشیاء سمیت زندگی بچانی والی ادویات کی دوسری کھیپ روانہ کردی گئی۔ امدادی سامان میں آٹا ، دالیں ، خشک دودھ،چینی ،بسکٹس کے علاوہ ملبوسات سمیت زندگی بچانے والی ادویات بالخصوص بچوں کی بیماریوں اور جلدی بیماریوں سے بچانے والی ادویات اور پینے کاصاف پانی بھی شامل ہے ۔ اس موقع پر رابطہ کمیٹی کہ رکن کنور نوید جمیل نے کہا کہ کارکنان ، الطاف حسین کی ہدایات پر عمل پیرا ہیں اور ایم کیوایم دکھی انسانیت کے جذبے سے سرشار ہو کر بلا امتیازرنگ و نسل دکھی انسانیت کی خدمت پر یقین رکھتی ہے ۔انھوں نے ملک و بیرون ملک مقیم مخیرحضرات سے بھی اپیل کی کہ وہ نائن زیرو اور کے کے ایف کے مرکزی دفتر میں تھر پارکر کے قحط متاثرین کی مدد کے لیے قائم امدادی کیمپوں میں زیاہ دہ سے زیادہ غذائی اجناس ، زندگی بچانے والی ادویات اور دیگر ضروری سامان جمع کرائیں۔ تھرکے قحط زدہ افراد بھی ہمارے بھائی ہیں اور اس مشکل کی گھڑی میں انکی نگاہیں ہماری مدد کی منتظرہیں۔ دریں اثناء ایم کیو ایم رابطہ کمیٹی نے ڈیرہ اسماعیل خان کے علاقے کنڈی عمر خان میں پولیو ورکرز کی حفاظتی ڈیوٹی پر ماموردو پولیس اہلکاروں کے قتل کی شدید الفا ظ میں مذمت کی اور کہا ہے کہ نامعلوم ہشتگردوں کی جانب سے اس سے قبل بھی پولیو کے قطرے پلانے والے رضاکاروں اور انکی حفاظت پر مامور سکیورٹی اہلکاروں کو نشانہ بنایاجا تا رہا ہے جو کہ قابل افسوس ہے۔ رابطہ کمیٹی نے وفاقی اور صوبائی حکومت خیبرپختونخواہ سے مطالبہ کیا ہے کہ پولیو کے قطرے پلانے والے رضاکاروں اور پولیو ورکرز کی حفاظتی مہم کی ڈیوٹی پر مامور پولیس اہلکاروں کے قیمتی جانوں کے تحفظ کیلئے فول پروف انتظامات کئے جائیں۔