کراچی…متحدہ قومی موومنٹ کی رابطہ کمیٹی نے لیاری میں قتل وغارتگری کی سخت ترین الفاظ میں مذمت کی ہے اورلیاری گینگ وار کے جرائم پیشہ دہشت گردوں کی فائرنگ سے خواتین اور بچوں سمیت درجنوں بے گناہ افراد کے شہید وزخمی ہونے پر گہرے دکھ اور افسوس کا اظہار کیا ہے ۔ ایک بیان میں رابطہ کمیٹی نے کہاکہ گزشتہ کئی برسوں سے لیاری کے معصوم اور محنت کش عوام ، گینگ وارکے دہشت گردوں کے ہاتھوں یرغمال بنے ہوئے ہیں اور جرائم پیشہ عناصر جدید ترین ہتھیاروں سے لیس ہوکر علاقے کے بے گناہ عوام کو خاک وخون میں نہلارہے ہیں۔ اب ان دہشت گردوں کی جانب سے لیاری کی معصوم خواتین اوربچوں تک کو دہشت گردی کا نشانہ بنایاجارہا ہے ۔ آج صبح بھی لیاری گینگ وارکے دہشت گردوں کی جانب سے لیاری کے مختلف علاقوں میں جدیدترین ہتھیاروں کاآزادانہ استعمال کیا گیا جس کے نتیجے میں4 خواتین اور2 بچوں سمیت 17 افراد جاں بحق ہوچکے ہیں جبکہ درجنوں شدید زخمی ہیں۔رابطہ کمیٹی نے کہاکہ اس مشکل ترین حالات میں لیاری کے منتخب عوامی نمائندے بھی غائب ہیں اور علاقے کے عوام کی دادرسی کرنے والا کوئی نہیں ہے ۔ ایسا محسوس ہوتا ہے کہ حکومت نے لیاری کے بے گناہ عوام کو سفاک دہشت گردوں اور قاتلوں کے رحم وکرم پرچھوڑ دیا ہے ، ان حقائق کی روشنی میں عوام یہ سوال کرنے میں حق بجانب ہیں کہ اگر کراچی میں ٹارگٹڈ آپریشن قیام امن کیلئے کیاجارہا ہے تو شہر میں آئے دن ٹارگٹ کلنگ، ڈکیتیوں، اغواء اورلوٹ مارکے واقعات کیوں پیش آرہے ہیں۔ ؟ لیاری کے بے گناہ عوام ،لیاری گینگ وارکے دہشت گردوں کے ہاتھوں یرغمال کیوں بنے ہوئے ہیں ؟ اور آزمائش کی اس گھڑی میں لیاری کے عوام کے ووٹوں سے منتخب ہونے والے ارکان اسمبلی کہاں غائب ہیں؟ دوسری جانب آپریشن کے نام پر نہتے شہریوں کو فائرنگ کرکے ہلاک وزخمی کیاجارہا ہے ، غیرقانونی چھاپے ماراور جھوٹے مقدمات کا سلسلہ جاری ہے ۔رابطہ کمیٹی نے وزیراعظم نوازشریف ، وزیرداخلہ چوہدری نثار اورگورنرسندھ ڈاکٹر عشرت العباد سے مطالبہ کیا کہ لیاری میں قتل وغارتگری اور دہشت گردی کے مسلسل واقعات کاسنجیدگی سے نوٹس لیاجائے اور گینگ وار دہشت گردوں کے خلاف سخت ترین قانونی کارروائی کی جائے ۔