کراچی.......متحد ہ قومی موومنٹ کے قائد الطاف حسین کی ہدایت پرآمد رمضا ن کی مناسبت سے شعبہ برائے خصوصی افراد کے زیر اہتما م پیر کو خورشید بیگم سیکریٹریٹ عزیزآباد میںمعذور افراد میں تحائف تقسیم کرنے کی پروقا ر تقریب منعقد کی گئی ۔ اس موقع پررابطہ کمیٹی کے ڈپٹی کنوینر ڈاکٹر خالد مقبول صدیقی ، اراکین رابطہ کمیٹی ڈاکٹر فاروق ستار ، احمد سلیم صدیقی اور آنسہ ممتاز ،عدنان سرور، کشور زہرہ و اراکین نے شرکت کی اور راشن تقسیم کیا۔ تقریب سے اظہار خیال کرتے ہوئے ڈاکٹر خالد مقبول صدیقی نے کہا کہ الطاف حسین نے خصوصی افراد سے ہمیشہ محبت کی ہے اور اپنے کارکنان کو بھی معذور اور خصوصی افراد سے محبت اور انکی داد رسی کرنے کی ہدایت کی ہے یہی وجہ ہے کہ آج ایم کیو ایم کے شعبہ برائے خصوصی افراد PWDsونگ کے زیر اہتمام اس تقریب کا انعقاد کیا ہے انھوں نے تقریب کے کامیاب انعقاد پر تقریب کے منتظمین کو خراج تحسین پیش کیا ۔انچارج شعبہ خواتین کشور زہرہ نے کہا کہ دنیا بھر میں مذہبی تہواروں کی آمد کے ساتھ ہی شہریوں کو سہولیات فراہم کی جاتی ہیں لیکن بد قسمتی سے پاکستان میں رمضان کی آمد کیساتھ ہی اشیاء خورد نوش اور راشن کی قیمتوں میں اضافہ ہو جاتا ہے جس کے سبب ایک غریب متوسط طبقے کا فرد رمضان میںسہولیات سے محروم ہو جاتاہے ، الطاف حسین نے اپنی سیاسی جدوجہد کے آغاز سے ہی انسانیت کی خدمت کے لئے خدمت خلق فاؤنڈیشن کے نام سے فلاحی ادارے کی بنیاد رکھی جو آج تک لاکھوں مستحقین کی امداد اور داد رسی کررہا ہے اور ملک کے کسی بھی حصے میں آنے والی ناگہانی آفات اور پریشانیوں کے وقت خدمت خلق فاؤنڈیشن کے رضاکار الطاف حسین کی ہدایت پر اپنے ہم وطنوں کی امداد کے لئے موجود ہوتے ہیں ۔تقریب سےرابطہ کمیٹی کے اراکین ڈاکٹر فاروق ستار، احمد سلیم صدیقی اور عدنان سرور نے بھی اظہار خیال کیا ۔دریں اثنا الطاف حسین کی ہدایات پر خدمت خلق فائونڈیشن کی جانب سے شمالی وزیرستان سے نقل مکانی کرنیوالے آئی ڈی پیز کی امداد کے لئے کراچی میں خدمت خلق فاؤنڈیشن کے مرکزی دفتر سے غذائی اجناس ، ادویات اوردیگر امدادی سامان پر مشتمل 2ٹرک پیر کے روز روانہ کر دئیے گئے ہیں۔دو نو ںٹرک رابطہ کمیٹی کے اراکین ڈاکٹر فارق ستار، سید امین الحق ، گلفراز خان خٹک ، کہف الوریٰ اور اراکین اسمبلی نے اپنی نگرانی میں روانہ کیا ۔اس موقع پر اراکین رابطہ کمیٹی نے خدمت خلق فاؤنڈیشن کے رضاکاران اور موقع پر موجود ایم کیو ایم کے کارکنان سے گفتگو کرتے ہوئے کہاکہ الطاف حسین نے ہمیشہ بلا امتیاز رنگ ، نسل ، مذہب اور زبان کے ملک کے محروم و مظلوم عوام کی ہر مشکل گھڑی میں امدا دکی ہے اوراپنے کارکنان اور رضاکاران کو بھی دکھی انسانیت کی خدمت اور داد رسی کا درس دیا ہے لہٰذا یہ ہمارا فرض ہے کہ ہم بھی پاکستان کے مظلوم و محروم عوام کی بلا امتیاز خدمت کریں اور اسی لئے آج شمالی وزیرستا ن سے نقل مکانی کرنے والے اپنے ہم وطنوں کے لئے کے کے ایف کی جانب سے امدادی ٹرک بھی روانہ کئے جار ہے ہیں۔