شکاگو...... ایم کیو ایم امریکہ کے سینٹرل آرگنائزر جنید فہمی، جوائنٹ آرگنائزرزمحمد ارشد حسین اور ندیم صدیقی سمیت سینٹرل آرگنائزنگ کمیٹی کے اراکین اور چیپٹر انچارجز نے 6 جولائی کو ایم کیو ایم کی جانب سے پاک فوج سے اظہار یکجہتی کے لئے منعقد کئے جانے والے اجتماع کے ذریعے پوری قوم کو مذہبی انتہاء پسندی اور دہشتگردی کے خلاف متحد کرنے کی تاریخ ساز کوشش قرار دیا ہے۔انہوں نے کہا کہ پاک فوج سے یکجہتی کے لئے کراچی میں ہونے والا اجتماع ملک دشمنوں کے تابوت میںآخری کیل ثابت ہو گا ۔اپنے مشترکہ بیان میں انہوں نے کہا آج جب مسلح افواج ملک سے دہشتگردی کے خاتمے کے لئے شمالی وزیرستان میں فیصلہ کن آپریشن کررہی ہیں تو یہ ہماری سیاسی قیادت کی اولین ذمہ داری ہے کہ وہ کسی اگر اور مگر کے بغیراپنے بہادر فوجی جوانوں اور افسروں کا کھل کر ساتھ دیں۔انہوں نے کہا کہ الطاف حسین نے ملک کی سلامتی اور بقاء کو در پیش ہر چیلنج سے نبرد آزما پاک افواج کے ساتھ کھڑے ہو کر یہ ثابت کردیا ہے کہ وہ پاکستان کی ریاست کو سیاست سے زیادہ مقدم اور محترم سمجھتے ہیں ،پاک افواج سے اظہار یکجہتی کے اجتماع کے اعلان کے بعد سے امریکہ میں بسنے والے پاکستانیوں میں زبردست جوش و خروش پایا جا رہا ہے اوروہ اسے انتہائی بروقت ا قدام قرار دے رہے ہیں۔ انہوں نے مزید کہا کہ پاکستان میں بڑھتی ہوئی دہشتگردکاروائیوں ، بم دھماکوںاور ائیرپورٹس پر حملوں نے عالمی سطح پر ملک کا امیج جس بری طرح مسخ کیا ہے اس نے بیرون ملک آباد لاکھوں پاکستانیوں کو براہ راست متاثر کیا ہے۔ایم کیو ایم امریکہ کے ذمہ داران نے پاکستان کے غیور عوام سے اپیل کی کہ وہ پاک فوج سے اظہار یکجہتی کے لئے 6 جولائی کو ہونے والے تاریخی اجتماع میں شریک ہو کر پاکستان کو بچانے کی جدوجہد میں اپنا قومی کردار ادا کریں۔ آخر میں انہوں نے آپریشن ضرب عضب کی کامیابی کے لئے دعاء کی اور ایم کیو ایم امریکہ کے ہزاروں کارکنان اور ہمدردوں کی جانب سے پاک فوج کو اپنی مکمل حمایت کا یقین دلایا۔