23 ستمبر ، 2014 
حکومت بجلی پر سبسڈی کے خاتمے کی مجبوری بتائے ،سپریم کورٹ
23 ستمبر ، 2014
اسلام آباد......جسٹس جواد ایس خواجہ نے کہا ہےکہ حکومت بتائے کہ ایسی کیا مجبوری ہے کہ بجلی پر سبسڈی ختم کی گئی ۔بجلی کی قیمتوں بارے عالمی اعدادوشمار کو دیکھیں گے، ضرورت پڑی تو اٹارنی جنرل کو بلایا جائے گا۔جسٹس جواد ایس خواجہ کی سربراہی میں تین رکنی بنچ نے بجلی لوڈ شیڈنگ کیس کی سماعت کی، جسٹس جواد ایس خواجہ نے کہا کہ بھارتی حکومت نے عالمی اداروں کا دباو برداشت کیااور بجلی پر سبسڈی برقرار رکھی، حکومتی وکیل نےموقف اختیار کیا کہ بجلی پر سبسڈی دی تو تعلیم کے شعبے سے پیسے نکالنے پڑیں گے۔ جسٹس دوست محمد کا کا کہنا تھا کہ فیول ایڈجسٹمنٹ کا فارمولا غلط ہے، عالمی منڈی میں تیل کی قیمت بڑھتی ہے تو حکومت سٹاک میں رکھے تیل کی قیمت بھی بڑھا دیتی ہے، کیس کی مزید سماعت 10 روز بعد ہو گی۔
