کراچی … کراچی کے مختلف علاقوں میں پرتشدد واقعات اور ذاتی دشمنی کے جھگڑے میں فائرنگ سے 6 افراد ہلاک ہوگئے ہیں، ایک شخص نے مبینہ طور پرگولی مار کر خودکشی کرلی۔ پولیس کے مطابق لاسی گوٹھ میں جھگڑے کے بعد نیوکراچی کے علاقے بشیر چوک کے قریب ہوٹل پر فائرنگ کی گئی جس کے نتیجے میں 2 افراد جاں بحق ہوگئے۔ جاں بحق ہونے والوں میں سے ایک شخص کی شناخت ناصر کے نام سے ہوئی ہے جو نجی سیکیورٹی کمپنی کا گارڈ ہے۔ پولیس کے مطابق ہوٹل پر فائرنگ کا واقعہ ذاتی دشمنی کا نتیجہ ہے۔ کورنگی اور لانڈھی میں فائرنگ سے 3 افراد زخمی ہوگئے۔ فائرنگ سے زخمی ہونے والا ایک شخص جاں بحق ہوگیا ہے۔ پرانی سبزی منڈی کے قریب ہوٹل پر فائرنگ سے 3 افراد زخمی بھی ہوئے۔ اورنگی ٹاوٴن کے علاقے مومن آباد میں فائرنگ سے ایک شخص جاں بحق ہوا، جبکہ لانڈھی بابر مارکیٹ میں موٹر سائیکل سواروں کی فائرنگ سے ایک شخص موقع پر ہی دم توڑ گیا۔ ادھر منگھوپیر کے علاقے میں بھی فائرنگ سے ایک شخص جاں بحق ہوا۔ قائدآبادمیں مرغی خانہ اسٹاپ کے قریب فائرنگ سے ایک شخص زخمی ہوا، دوسری جانب جٹ لائن میں گھریلو تنازع کے بعد ایک شخص نے فائرنگ کرکے خاتون سمیت 2 افراد کو زخمی کردیا اور مبینہ طور پر خود کو گولی مار کر خود کشی کرلی۔