کراچی.......این اے 246کی نشست پر ہونیو الے ضمنی انتخاب میں نامزد متحدہ قومی موومنٹ کے نامزد امیدوار کنور نوید جمیل نے کہا ہے کہ حلقہ این اے 246کے عوام کی الطاف حسین سے وابستگی نظریاتی بنیادوں پر انتہائی مضبوط ہے ، پی ٹی آئی کے نامزد امیدوار اور دیگر رہنما اس حلقہ میں ضمنی انتخاب میں جس طرح سے محاذ آرائی پر اترے ہوئے ہیں، اس سے حلقہ انتخاب کے عوام کے جذبات مجروح ہورہے ہیں ۔ ان خیالات کااظہار انہوں نے انتخابی مہم کے سلسلے میں لیاقت آباد شریف مسجد الصفاء روڈ اور لیاقت آباد نمبر 4مسجد دارالصلوۃ یونین کونسل نمبر 8میں انتخابی کارنر میٹنگوں کے شرکاء سے خطاب کرتے ہوئے کیا ۔ اس موقع پرحق پرست اراکین قومی وصوبائی اسمبلی ، فیڈرل بی یریا اور لیاقت آباد سیکٹر کمیٹی کے اراکین بھی موجود تھے ۔ انتخابی دفاتر پر عوام و کارکنان نے نامزد امیدوار کنور نوید جمیل کا پرتپاک استقبال کیا اور ان پر پھولوں کی پتیاں نچھاور کیں اور الطا ف حسین اور ایم کیوایم کے حق میں فلک شگاف نعرے لگائے ۔ عوامی اجتماعات سے کنو رنوید جمیل نے اپنے خطاب میں کہاکہ ایم کیوایم پرامن او رجمہوری سیاسی جماعت ہے ، پی ٹی آئی سمیت دیگر جماعتیں کراچی میں طاقت ، دھونس دھاندلی کے ذریعے ماضی بھی ایم کیوایم سے عوامی مینڈیٹ چھیننے کیلئے اوچھے ہتھکنڈے استعمال کرتی رہی ہیں لیکن اس کے باوجود عوام نے ہر انتخابات میں الطاف حسین کے نامزد کردہ امیدواروں کو بھاری اکثریت سے کامیاب کرایا ہے ۔انھوں نےعوام سے اپیل کی کہ وہ انتخابی مہم کے دوران شرپسند عناصر پر کڑی نگاہ رکھیں ۔