اسلام آباد … اسپیکر قومی اسمبلی نے وزیراعظم کے خلاف نااہلی کا ریفرنس الیکشن کمیشن کو نہ بھجوانے کا فیصلہ کرلیا ہے۔ ذرائع کے مطابق اسپیکر قومی اسمبلی ڈاکٹر فہمیدہ مرزا نے وزیراعظم کی نااہلی سے متعلق اپنی رولنگ دیدی ، وزیراعظم یوسف رضا گیلانی کو توہین عدالت کیس میں سزا کے بعد اسپیکر قومی اسمبلی کو سپریم کورٹ کے فیصلے کی روشنی میں الیکشن کمیشن کو ریفرنس بھیجنے کا فیصلہ کرنا تھا، اسپیکر قومی اسمبلی ڈاکٹر فہمیدہ مرزا نے 5 صفحات پر مشتمل فیصلے میں کہا ہے کہ وہ وزیراعظم کے خلاف نااہلی کا ریفرنس الیکشن کمیشن کو نہیں بھیجیں گی۔ فیصلے کے مطابق اسپیکر قومی اسمبلی کو اسسٹنٹ رجسٹرار سپریم کورٹ کے ذریعے بھجوائے گئے فیصلے کے طریقہ کار پر تحفظات ہیں۔ ذرائع کے مطابق اسپیکر نہیں سمجھتیں کہ توہین عدالت کا کیس وزیراعظم کے خلاف تھا اس لئے نااہلی کا ریفرنس نہ بھیجنے کا فیصلہ کیا گیا۔ اسپیکر قومی اسمبلی کے فیصلے کے متن میں درج ہے کہ رجسٹرار سپریم کورٹ کی طرف سے بھیجا گیا فیصلہ اقدار کے منافی ہے۔ اسپیکر نے رولنگ دی ہے کہ میں نے عدالت کے مختصر اور تفصیلی فیصلے کا جائزہ لیا، میں نے توہین عدالت سے متعلقہ شقوں کا بھی تفصیلی جائزہ لیا۔ اسپیکر قومی اسمبلی نے اپنے فیصلے میں مخدوم جاویدہاشمی کے فیصلے کا حوالہ دیا ، اسپیکرنے اپنی رولنگ میں کنور انتظار محمد خان بنام فیڈریشن آف پاکستان کا بھی حوالہ دیا۔ ڈاکٹر فہمیدہ مرزا نے رولنگ دی ہے کہ اسپیکر قومی اسمبلی محض ایک پوسٹ افسر کا کام نہیں کرسکتیں۔ انہوں نے متن میں مزید درج کیا ہے کہ میرے پاس کوئی ریفرنس آتا ہے تو اسی طرح چیف الیکشن کمیشن کو بھجوانے کی پابند نہیں، اسپیکر کو منصفانہ فیصلہ کرنا ہوتا ہے کہ کیا نا اہلی کا سوال پیدا ہوتا ہے۔ اسپیکر نے رولنگ دی ہے کہ یہی نکتہ نظر سپریم کورٹ کے 2005ء میں ایک فیصلے میں بھی اپنایا گیا۔