کراچی......سندھ اور پنجاب کے اضلاع میں بلدیاتی انتخابات کی روایتی گہماگہمی نظر آئی۔ نوجوانوں کے ساتھ ساتھ بزرگ اور معذور افرادبھی حق رائے دہی استعمال کرنے پولنگ اسٹیشن پہنچے۔

سندھ اور پنجاب کے 26 اضلاع میں بلدیاتی انتخابات کے دوسرے مرحلے کیلئے ووٹنگ ہوئی۔ ووٹ سے اپنے علاقے کی حالت بدلنے کا عزم لیے ووٹر اپنا حق رائے دہی استعمال کرنے بڑی تعداد میں پہنچے ۔

قومی ذمے داری پوری کرنے میں بزرگ اور معذور بھی کسی سے پیچھے نہیں رہے،عمر کوٹ میں کچھ بزرگ لوگوں کے سہارے تو کچھ لاٹھی کے سہارے ووٹ کاسٹ کرنے آئے۔

بدین،خانیوال اور ٹوبہ ٹیک سنگھ میں بھی بزرگ شہریوں نے ووٹ ڈالا۔خانیوال میں ووٹ ڈالنے کیلئے ایک شخص ضعیف شہری کو گود میں اٹھا کر لایا۔

کبیر والا کی ایک یونین کونسل میں 60 سال بعد خواتین نے ووٹ کاسٹ کیے۔سرگودھا اور شیخوپورہ میں بزرگ شہری وہیل چیئر پرووٹ کاسٹ کرنے آئے۔عمر کوٹ میں شوہر ووٹ ڈالنے کیلیے اپنی معذور بیوی کو بازوؤں میں اٹھا کر لایا۔

سرگودھا میں باہمت معذور شخص ووٹ کاسٹ کرنے پہنچا۔بدین میں بیساکھیوں کے سہارے اور عمر کوٹ میں لاٹھی کے سہارے بزرگ افراد ووٹ ڈالنے آئے۔

میانوالی میں ایک پولنگ اسٹیشن میں دلچسپ صورتحال دیکھنے کو ملی۔ جہاں پولنگ اسٹاف میں شامل خواتین نے پردے میں اپنی ذمے داریاں نبھائیں۔