راولپنڈی… سیاچن پر دو روزہ پاک بھارت سیکریٹری دفاع مذاکرات کا آج دوسرا اورحتمی دور راولپنڈی میں ہوگا، ذرائع کے مطابق پاکستان نے بھارت پر زور دیا ہے کہ سیاچن سے افواج کو واپس بلا لیا جائے۔ سیاچن پر دوطرفہ مذاکرات کا یہ 13 واں دور ہے۔ کل ہونے والے مذاکرات میں پاکستانی وفد کی قیادت سیکریٹری دفاع نرگس سیٹھی نے کی، جبکہ ڈی جی ملٹری آپریشنز اور وزارت خارجہ کے حکام بھی موجود تھے،،نو رکنی بھارتی وفد کی قیادت بھارتی سیکریٹری دفاع ششی کانت شرما نے کی۔ وزارت دفاع کے ذرائع کے مطابق پاکستان نے بھارت پر سیاچن سے فوجوں کی واپسی کی ضرورت پر زوردیا۔ ذرائع کا کہنا ہے کہ بھارتی فوج چاہتی ہے کہ فوجوں کا انخلا ء علاقے کے موجودہ کنٹرول کو برقرار رکھ کر کیا جائے جبکہ پاکستان کا موقف ہے کہ انخلا 1984 والی پوزیشن کے مطابق ہونا چاہیئے۔سانحہ گیاری کے بعد سیاچن پر یہ پہلے پاک، بھارت مذاکرات ہیں۔ سانحہ گیاری کے بعد پاکستان کے آرمی چیف جنرل اشفاق پرویز کیانی نے بھی سیاچن سے فوجوں کے انخلا کی حمایت میں بیان دیا تھا،تاہم بھارت کی فوجی اور سیاسی قیادت نے اس پر کسی پیش رفت کا عندیہ نہیں دیا۔ دوروزہ مذاکرات کے اختتام پرآج وزارت دفاع سے مشترکا اعلامیہ جاری کیا جائے گا۔